ბაია გადაბაძის სკანდალური განცხადება - დეტალები TV ,,მაესტროს“ შესახებ

საზოგადოება - 15:50, 02 Feb, 2016

4691

ტელეკომპანია „მაესტროს“ გენერალურმა დირექტორმა ბაია გადაბაძემ სპეციალური მიმართვა გაავრცელა.

„ტელეკომპანია მაესტროს მეწილეების ნაწილი, რომლებიც წლების განმავლობაში იყვნენ ჩვენი სარედაქციო დამოუკიდებლობის გარანტორები დღეს აღმოჩნდნენ უმცირესობაში. ეს ვითარება გამოიწვია პარტნიორების ერთი ნაწილის მიერ წილების გასხვისებამ, რომლის რეალური მყიდველიც გახდა ტელეკომპანია „იმედის“ არაოფიციალური მმართველი ირაკლი რუხაძე. გაკოტრებული კომპანიის წილი რამდენიმე მილიონად გაიყიდა, რაც არანაირ ბიზნეს ლოგიკაში არ ჯდება, კომპანიას რომელსაც გააჩნია 50 მილიონიანი ვალი ფინანსური თვალსაზრისით, არ შეიძლება იყოს მიმზიდველი. ერთადერთი მიმზიდველობა, რაც „მაესტროს“ შეიძლება ქონდეს, ეს არის პოლიტიკური მიმზიდველობა, რაც სარედაქციო დამოუკიდებლობის წყალობით მას გამოარჩევდა ქართულ ტელებაზარზე. მე თითქმის სამი წელია მაესტროს დირექტორი ვარ, თუმცა გაცილებით დიდი ხანია რაც ამ არხზე ვმუშაობ. ჩვენ ყველას გვაერთიანებდა საერთო ღირებულებები და ადამიანები, რომლებიც ამ ღირებულებების ერთგულნი იყვნენ. დღეს კი ვითარება იმგვარია, რომ ზოგიერთისათვის ღირებულებებს ჰქონია ძალიან კონკრეტული ფასი. წილის გამყიდველების ბატონი ებრალიძის და ჩიკვაიძის წილის 1% ღირს -460 ათასი დაახლოებით, მათ არც შემოქმედებით და არც ფინანსურ ნაწილში მონაწილეობა არ მიუღიათ ფინანსურად მხოლოდ ერთი დამფუძნებელი იღებდა მონაწილეობას, ეს არი მაკა ასათიანი. ისინი ხელფასს იღებდნენ წლების განმავლობაში და მაშინ, როდესაც სრულიად გაურკვეველი იყო მათი სამსახურებრივი პოზიციები, სამი წელია მაესტროს დირექტორი ვარ და სამჯერ არ მინახავს გიორგი ებრალიძე და არც თავისი უკმაყოფილების შესახებ არ გამოუთქვამს. ის ამბობს, რომ მის სახელს არ უნდა უკავშირდებოდეს დღევანდელი მაესტრო და ეს ასეც არის, მის სახელს მართლაც არაფერი არ უკავშირდება ამ ტელევიზიაში. განვითარებული მოვლენების შედეგი შესაძლოა იყოს ტელევიზიის სარედაქციო დამოუკიდებლობის დაკარგვა. მე არ ვაპირებ მაესტროში მუშაობას ამ პარტნიორების ახალი კონფიგურაციის პირობებში . მე ველოდები პარტნიორების საბოლოო გადაწყვეტილებას და მანამდე ვასრულებ ჩემ უფლება-მოვალეობას“- განაცადა ბაია გადაბაძემ.