ხმაური და დაპირისპირება ზუგდიდში - METROS-ს ავტობუსებს კვერცხები დაუშინეს

საზოგადოება - 14:29, 01 Feb, 2016

3064

ხმაურია ამ წუთებში ზუგდიდში ავტოსადგურის ტერიტორიაზე, სადაც საერთაშორისო და საქალაქთაშორისო სამარშუტო ტაქსების 500 მდე მძღოლი საპროტესტო აქციას მეორე დღეა მართავს.

როგორც "ნიუპოსტის" კორესპოდენტი ზუგდიდიდან იტყობინება, ადგილი ჰქონდა მცირე დაპირისპირებას მძღოლებსა და ადგილზე მობილიზებულ სამართალდამცავებს შორის.
პოლიციის თანამშრომლებმა მძღოლებს ადგილზე მიტანილი საღებავები წაართვეს, მას შემდეგ რაც აქციის მონაწილეებმა თურქული კომპანიის „მეტრო ჯორჯიას“ ავტობუსებს საღებავები და კვერცხები ესროლეს.

აქციის მონაწილეები მთავარი გზის პიკეტირებით იმუქრებიან, მათი განცხადებით, "მეტროს" შემოსვლით ისინი სამუშაო ადგილებს ავტომატურად კარგავენ.

მძღოლების განცხადებით, იმ შემთხვევაში თუ ხელისუფლება მათ მოთხოვნებს არ გაითვალისწინებს, ისინი აღნიშნული კომპანიის წინააღმდეგ პარტიზანულად იმოქმედებენ და მათ მიკროავტობუსებს დააზიანებენ. მძღოლების თქმით, მათ იციან, რომ აღნიშნული ქმედება დანაშაულია, თუმცა უკიდურესი სოციალური პირობების გამო მათ სხვა გზა არ აქვთ, რადგან მათი ოჯახები შემოსავლის გარეშე რჩებათ და ამასთანავე მათ კრედიტები აქვთ ბანკებშიც.