სოფლის საბავშვო ბაღებში სასწავლო პროცესი ერთი კვირით გადაიდო

საზოგადოება - 18:34, 31 Jan, 2016

1736

ოზურგეთის მუნიციპალიტეტის სოფლებში საბავშვო ბაღებში სწავლის პროცესი ერთი კვირით გადაიდო და 8 თებერვალს განახლდება, ამის შესახებ "გურიის მოამბეს" სააღმზრდელო-საგანმანათლებლო ცენტრიდან აცნობეს.

ცენტრის ხელმძღვანელის, ავთანდილ მექვაბიშვილის განცხადებით, სასწავლო პროცესის გადადების მიზეზი პირველ ეტაპზე უამინდობა და გახშირებული გრიპის ვირუსების ერთგვარი პრევენცია გახდა.

მისი თქმით, უამინდობას არც ერთ საბავშვო ბაღში სხვა პრობლემა არ შეუქმნია. არ დაზიანებულა შენობები: "გადავდეთ ერთი კვირით იმიტომ, რომ იცით როგორი ამინდები იყო და ასევე არის ერთგვარი პრევენცია ამ ვირუსებთან დაკავშირებით. მინდა გითხრათ, რომ არც ერთი ბაღის შენობა მიუხედავად უხვი ნალექისა არ დაზიანებულა. მომავალი კვირიდან დავიწყებთ დისტრიბუციას, საკვებ პროდუქტებს შევიტანთ ბაღებში და თუ კიდევ არ შეიცვალა ამინდები და ისევ არ დარჩა საჭირო სწავლის პროცესის გადადება, ჩვენ ორშაბათისთვის მზად გვექნება ყველაფერი"-გვითხრა მექვაბიშვილმა.

რაც შეეხება ლანჩხუთს, როგორც ბაღების გაერთიანების ცენტრის ხელმძღვანელი, დავით წულაძე "გურიის მოამბესთან" აცხადებს, ხვალიდან სასწავლო პროცესი იმ საბავშვო ბაღებში არ განახლდება, სადაც თოვლის საფარი ნახევარ მეტრომდეა: "ვერ დავიწყებთ სასწავლო პროცესს მარალმთიან სოფლებში, სადაც თოვლი ისევ დიდია. ასეთი სოფლებია: აკეთი, აცანა, მამათი, ღრმაღელე და ჩოჩხათი. რაც შეეხება სუფსას, იქ სახურავის ჩამოშლის გამო ველოდებით ინფრასტრუქტურის სამსახურის დასკვნას, ექვემდებარება თუ არა შენობა რეაბილიტაციას, სხვა შემთხვევაში მოგვიწევს სხვა შენობის დაქირავება, ამიტომ აქ გაურკვეველია სწავლის დაწყების ვადები.

ჩოხატაურში კი, როგორც ადგილობრივი ცენტრიდან გვაცნობეს, ყველა საბავშვო ბაღი ჩვეულ რეჟიმში გააგრძელებს მუშაობას.