დაავადებათა კონტროლის ეროვნული ცენტრის ინფორმაციით, საქართველოში გრიპის ეპიდემიის საფრთხე არ არსებობს.

ამის შესახებ ცენტრის ხელმძღვანელმა ამირან გამყრელიძემ განაცხადა.

მისი თქმით, ამ ეტაპზე 100 ათას მოსახლეზე 332 გრიპის ვირუსის შემთხვევა დაფიქსირდა.

როგორც გამყრელიძე ამბობს, გრიპის ვირუსის შემთხვევის ზრდა არ დაფიქსირებულა და ამას ხელი იმანაც შეუწყო, რომ სკოლებში სწავლა შეწყდა.

„გრიპის ვირუსის ეპიდემიისგან ძალიან შორს ვართ. მინდა მოსახლეობას მივმართო და დავამშვიდო, რომ საპანიკო სიტუაცია არ გვაქვს. მართალია გასულ წელთან შედარებით უფრო მეტი შემთხვევები დაფიქსირდა გრიპის, მაგრამ ეს საშიში არ არის. ამას ეპიდემიის სახე არ მიეცემა“, - ამბობს გამყრელიძე.

განათლების სამინისტროს ინფორმაციით, გრიპის ვირუსის გამო სწავლა 282 სკოლაში შეწყდა.