ჯანდაცვის სამინისტრო მიმართავს მოსახლეობას 112-ში დარეკონ მხოლოდ მაშინ, თუ ვირუსული გრიპის ინფექციის გართულებასთან დაკავშირებით სასწრაფო სამედიცინო დახმარება ესაჭიროებათ.

ამის შესახებ უწყების მიერ გავრცელებულ განცხადებაშია ნათქვამი.

„მიმართეთ თქვენი ოჯახის ექიმს, რომელიც მოგემსახურებათ როგორც სამედიცინო დაწესებულებებში, ასევე ბინაზე. როდესაც თვლით, რომ ვირუსული გრიპის ინფექციის გართულებასთან დაკავშირებით გესაჭიროებათ სასწრაფო სამედიცინო დახმარება, მხოლოდ მაშინ დარეკეთ 112-ში, სადაც დახმარებას გაგიწევენ როგორც სასწარფო სამედიცინო პერსონალი, ასევე დამატებით 24 საათიან რეჟიმში მომუშავე მორიგე საოჯახო მედიცინის ცენტრები. 24 საათიან რეჟიმში მომუშავე საოჯახო მედიცინის ცენტრები ღამის საათებში ემსახურება მხოლოდ ვირუსული გრიპის ინფექციის მქონე პაციენტებს“, - ნათქვამია განცხადებაში.

გრიპის ვირუსის მატების გამო სასწრაფო დახმარების სამსახური და პირველადი ჯანდაცვის 2 დაწესებულება საგანგებო რეჟიმში მუშაობს. როგორ ჯანდაცვის მინისტრი ამბობს, გრიპის ეპიდემიის საფრთხე ამ ეტაპზე არ არსებობს, თუმცა ექიმები მოსახლეობას სიფრთხილისკენ მოუწოდებენ.

მედიკოსები მიმართავენ მოსახლეობას, გაციების შემთხვევაში ბავშვები სკოლაში არ გაუშვან, ხოლო თვითონ სამსახურებში არ წავიდნენ.