საბავშვო ბაღების თანხით აშენებული სასტუმრო - ფულის გათეთრება თუ სპორტის განვითარება

საზოგადოება - 21:52, 21 Jan, 2016

2254

ლანჩხუთის "გურიასა" და მისი დაფინანსების საკითხზე მსჯელობა და კამათი უკვე მეორე წელია აქტუალობას არ კარგავს.
ოპოზიცია გამგებელს და ასევე გუნდის პრეზიდენტ, ზაზა ურუშაძეს ბიუჯეტიდან მილიონობით ლარის არამიზნობრივ ხარჯვაში ედავება. გარდა ამისა, არის კითხვები იმ მიღებულ გადაწყვეტილებებთან და გათვლებთან დაკავშირებით, რასაც გამგებელი, როგორც ადგილობრივები ამბობენ, ერთპიროვნულ წყვეტს. ნაკლებად გამჭირვალე პროცესების შეფასებისას კი ყველაზე ხშირად ხაზს "ფულის მოტეხვის" მცდელობას, კორუფციას და გამგებლის მხრიდან "ბიუჯეტის განიავებას" უსვამენ.

ლანჩხუთის გამგებლის ყოფილი მოადგილე, "თავისუფალი დემოკრატების" ადგილობრივი ორგანიზაციის ლიდერი, ვახტანგ ზენაიშვილს გამგებელთან კიდევ ერთი კითხვა, საბავშვო ბაღების ასაშენებელი ფულით ურეკში 50 ადგილიანი სასტუმროს აშენებასთან და ახლა უკვე გაქირავებასთან დაკავშირებით უჩნდება:

ინფორმაცია გავრცელდა, რომ საფეხბურთო კლუბი ლანჩხუთის "გურია" მეორე წრისთვის ემზადება რუსი მწვრთნელით. გუნდი კი ურეკში, სასტუმრო '"ბერმუხაშია" შეკრებილი. გამგებელი და საკრებულოს უმრავლესობა აგრძელებენ ბიუჯეტის განიავებას. თუ გამოყოფილი თანხებით ვიმსჯელებთ, ფეხბურთი კვლავ რჩება წამყვან პოზიციებზე, მთავარ პრიორიტეტად. ფეხბურთის ლობისტები ამ უტიფრობას და თავგასულობას იმით ამართლებენ, რომ თითქოსდა ლანჩხუთელებს განსაკუთრებული დამოკიდებულება აქვთ ფეხბურთთან. არადა ეს მითი, რომელიც კომუნისტური ეპოქის ჩრდილოვანი ეკონომიკიდან იღებს სათავეს, ერთ მიზანს ემსახურება: ფეხბურთს ამოფარებულმა ბიუროკრატიამ რაც შეიძლება მეტი დივიდენდი მიიღოს, როგორც ბიუჯეტიდან დატაცებული თანხებით, ისე "კლუბს" შეფარებული საარჩევნო აქტივისტების სახით. ერთი საკითხი კიდევ: ამას წინათ ლანჩხუთის გამგეობამ დიდი რიხით გვამცნო, რომ გრიგოლეთში საფეხბურთო ბაზის რეაბილიტაცია ჩაატარეს და 50 ადგილიანი სასტუმრო გაუშვეს ექსპლოატაციაში. სხვათა შორის იმ თანხით, რომლითაც საბავშვო ბაღები უნდა აშენებულიყო. ჰოდა, ვგონებ ლოგიკურია ვიკითხო: რატომ შეიკრიბა გუნდი ურეკში? რატომ დარჩნენ ბავშვები ბაღის გარეშე, თუ სასტუმრო კვლავ სხვაგან უნდა გექირავებინათ? იქნებ იმიტომ, როგორც "ბოროტი ენები" ამბობენ, ასე მეტი ფულის "მოტეხვა" რომ შეიძლება... მაგრამ მთავარი მაინც ისაა, რომ როგორმე შევაჩეროთ მადაგახსნილი ზაზა ურუშაძე და ბიუჯეტს ჩამოვხსნათ ზედმეტი ბარგი ლანჩხუთის "გურიის" სახით.

ამავე თემაზე წერს ლანჩხუთის საკრებულოს დეპუტატი და ფრაქცია "ლანჩხუთი ევროატლანტიკური მომავლისათვის" წევრი, ელგუჯა ჩხაიძე:

"დღეს საკრებულოს სხდომაზე ფეხბურთის თემამ გაიჟღერა.რაიონის გამგებელს ბატონ ურუშაძეს, იგივე გუნდის პრეზიდენტს, აბდალაი ხალხის ფულის მის გემოზე მხარჯველს, კითხვა დავუსვი-თუ ვინ არის "გურიას" ახალი სპონსორი? ლანხუთიდან არაფერს ითხოვსო-მიპასუხა, რა მნიშვნელობა აქვსო. გეკითხებით, ფულს ინტერესის გარეშე დახარჯავს? თუ ასეა, მაგარი აბდალაი ყოფილა. ანდა, აი ჩვენი გამგებელია კაი ყალთაბანდი"-წერს ჩხაიძე, რომელსაც ექსპერტი ადგილობრივი თვითმმართველობის საკითხებში ამირან გოგინეიშვილი ეხმაურება: " სპონსორს თავისი გათვლა აქვს, ინვესტორს თავისი. თავისუფალ ბაზარზე სხვა წესი არ არსებობს. სხვანაირად ან იძულებაა, ან, ფუი ეშმაკს და ტოტალიზატორის სუნი დადგება".

თეა იოსელიანი, გურია