საქართველოს პირველი ლედი მაკა ჩიჩუა დღეს საქართველოს პრეზიდენტის სარეზერვო ფონდის დაფინანსებით განხორციელებული პროექტის - თუში ქალების ხელსაქმის სოციალური საწარმოს პრეზენტაციას დაესწრო, რომელიც საქართველოს ხალხური და გამოყენებითი ხელოვნების სახელმწიფო მუზეუმში გაიმართა.

პროექტის ავტორი „დიალოგისა და განვითარების სახლია“, სოციალური საწარმო სოფელ ალვანში ჩამოყალიბდა და იგი თუშეთში ქალთა თემის გაძლიერებას ემსახურება.

პრეზენტაციაზე პროექტის მონაწილეებზე გადაღებული დოკუმენტური ფოტომასალის და სასწავლო პროცესის ფარგლებში შექმნილი ნამუშევრების გამოფენა მოეწყო.

მაკა ჩიჩუას პროექტის ბენეფიციარებმა საკუთარი შთაბეჭდილებები გაუზიარეს და სამახსოვრო საჩუქრები გადასცეს.

“ამ პროექტმა საშუალება მისცა თუშ ქალებს, რომ დასაქმდნენ და აღადგინონ კულტურული მემკვიდრეობა. აქ გამოფენილი ნამუშევრები, რეალური მაგალითია იმისა, რომ ასეთ პროექტებს აუცილებლად სჭირდება მხარდაჭერა. ქალები არაჩვეულებრივად ართმევენ თავს იმას, რაც გენეტიკურად გვაქვს, ნიჭი, რომელსაც სჭირდბა განვითარება და ხელშეწყობა. ვფიქრობ ასეთი პროექტების მხარდაჭერა ყოველთვის მისასალმებელია,“-აღნიშნა მაკა ჩიჩუამ.

პროექტის თანადამფინანსებლები არიან გერმანიის საზოგადოება საერთაშორისო თანამშრომლობისათვის (GIZ) და ეკონომიკური კვლევების საერთაშორისო ცენტრი ( EPRC).

პრეზენტაციას პროექტში ჩართული ექსპერტ-პედაგოგები და პროექტის მონაწილე ბენეფიციარი, თუში ქალბატონები დაესწრნენ.