ხვალ პარლამენტის შენობასთან მარჯვენასაჭიანი ავტომობილების მფლობელები და არასამთავრობო ორგანიზაციები საპროტესტო აქციას გამართავენ. ისინი მარკვენასაჭიან ავტომობილებთან ერთად შსს-ს კანონპროექტს გააპროტესტებენ, რომლის განხილვა საკანონმდებლო ორგანოში ხვალ იგეგმება.

„21 იანვარს, 12:30 თბილისში, პარლამენტის შესასვლელთან (უკნა მხარეს) მარჯვენასაჭიანი ავტომობილების მფლობელები და არასამთვრობო ორგანიზაცია „ეკო ტრანსპორტ ცენტრი“ და სხვა არასამთავრობო ორგანიზაციები გააპროტესტებენ კანონპროექტის განხილვას, რომელიც გულისხმობს: მარჯვენასაჭიანი ავტომობილების რეგისტრაციის აკრძალვას, ცხრა წლის ზემოთ ავტომობილებზე განბაჟების ტარიფის 500%-ით გაძვირებას და მართვის მოწმობებზე 100 ქულიანი სისტემის შემოღებას.

როგორც ცნობილია, პრემიერმა გიორგი კვირიკაშვილმა მთავრობის სხდომაზე განაცხადა, რომ იგი მხარს უჭერს აღნიშნილი კანონის მიღებას. შესაბამისად, 21 იანვარს, 13:00 საათზე დარგობრივი ეკონომიკისა და ეკონომიკური პოლიტიკის კომიტეტში ჩაინიშნა სხდომა, სადაც შსს-ს წარდგენილ კანონპროექტს განიხილავენ.

აქციის მონაწილეები პარლამენტთან შეიკრიბებიან ატრიბუტებით როგორიცაა: ტრანსფარანტები, საჭე და სხვა. საზოგადოებისთვის დისკომფორტის თავიდან ასაცილებლად, ამ ეტაპზე არ მოიყვანენ ავტომობილებს.

ისინი ხელისუფლებას მოუწოდებენ არ მიიღოს კანონი, რომლითაც ვერც საცობების, ვერც უსაფრთხოებისა თუ ეკოლოგიურ პრობლემას ვერ მოაგვარებს, სამაგიეროდ შეზღუდავს საქართველოს მოქალაქეთა არჩევანის უფლებას: ჰყავდეს მარჯვენასაჭიანი ავტომობილი“, - ნათქვამია აქციის ორგანიზატორების მიერ გავრცელებულ განცხადებაში.