მთავრობა, ქართუ, საპატრიაქრო - უბრალო მოქალაქეები ოპერის გახსნას ვერ დაესწრებიან

საზოგადოება - 19:12, 18 Jan, 2016

3440

საზოგადოების მხრიდან მკვეთრად ნეგატიური შეფასება მოჰყვა იმ ფაქტს, რომ 30 იანვარს თბილისის ოპერისა და ბალეტის განახლებული შენობის გახსნაზე დასწრებას მხოლოდ მიწვეული პირები შეძლებენ.

როგორც ირკვევა, რეაბილიტირებული შენობის გახსნაზე მხოლოდ თეატრის, მთავრობის, საპატრიარქოსა და ქართუ ჯგუფის წარმომადგენლები იქნებიან წარმოდგენილნი.

თბილისის ოპერის სამხატვრო ხელმძღვანელის დავით კინწურაშვილის განცხადებით, თბილისის ოპერისა და ბალეტის ადმინისტრაციამ ქცენტი "საზოგადო მოღვაწეებზე" გააკეთა.

“ჩვენ ყველა ადამიანი მოვიწვიეთ, ვინც ამ დღეს თეატრში შეიძლება, მოხვედრილიყო. ჩვენ მაქსიმალური აქცენტი გავაკეთეთ საზოგადო მოღვაწეებზე თეატრალური მიმართულებით და იმ ადამიანებზე, ვინც ღირსია, რომ ეს დღე ნახოს. ჩვენ მოვიწვიეთ მხოლოდ ის ადამიანები და კომპანიების ხელმძღვანელები, ვინც ამ თეატრის აშენებაში მიიღო მონაწილეობა”, - ამბობს კინწურაშვილი.

მისი ინფორმაციით, მოწვეულებს შორის არიან მთავრობისა და საპატრიარქოს წარმომადგენლები, დელეგაციები უცხოეთიდან, საოპერო თეატრების სამხატვრო ხელმძღვანელები. ასევე, ხელოვნების ყველა სფეროს წარმომადგენლები.

დაავით კინწურაშვილი ირწმუნება, რომ გახსნის დღის ყველა მოსაწვევი, როგორც ეს სოციალურ ქსელებში გავრცელდა ქართუ ჯგუფისთვის არ გადაუციათ.

მისი თქმით, მიწვეულებს შორის ნამდვილად არიან ქართუს წარმომადგენლებიც, თუმცა "მათთვის მინიმალური რაოდენობა, ერთი რიგია გამოყოფილი”.