შოთაძის მოადგილე ადასტურებს, რომ გარდაცვლილი ვახტანგ ქირიაა

შოთაძის მოადგილე ადასტურებს, რომ გარდაცვლილი ვახტანგ ქირიაა - ახალი დეტალები

კრიმინალი - 01:16, 17 Jan, 2016

8063

ვაჟა-ფშაველას მე-7 კვარტლის, 24-ე კორპუსში აღმოჩენილი მამაკაცის ცხედარი სამეგრელო-ზემო სვანეთის საოლქო პროკურორს ვახტანგ ქირიას ეკუთვნის. აღნიშნული ფაქტი ჟურნალისტებთან მთავარი პროკურორის მოადგილემ, გიორგი გაბიტაშვილმა დაადასტურა. მისი თქმით პროკურორო სავარაუდოდ მოკლულია, თუმცა პროკურატურა ოფიციალურ ინფორმაციას მოგვიანებით გაავრცელებს. ვახტანგ ქირიას ცხედარი ექსპერტიზისთვის პროზექტურაში გადაასვენეს.

ამასთანავე დამატებითი დეტალები ხდება ცნობილი იმ ბინასთან დაკავშირებით, სადაც მოკლული პროკურორის ცხედარი იქნა აღმოჩენილი. გავრცელებული ინფორმაციით აღნიშნული ბინა მუდმივ მაცხოვრებელს არ ეკუთვნოდა და ის ქირავდებოდა.

ვაჟა-ფშაველას მე-7 კვარტლის, 24-ე კორპუსთან ოჯახის წევრების და ახლობლების გარდა მისულები იყვნენ შინაგან საქმეთა სამინისტროს და მთავარი პროკურატურის პირველი პირები.

სამეგრელო ზემო სვანეთის საოლქო პროკურორი ვახტანგ ქირია 13 იანვარს გაუჩინარდა. მისი ახლობლების თქმით ის სახლიდან უცხო პირების მიერ მის ტელეფონზე განხორციელებული ზარის შემდეგ გავიდა. სახლიდან გასვლის შემდეგ ოჯახის წევრებმა მასთან დაკავშირება მხოლოდ ერთხელ შეძლეს. ქირიას ტელეფონი რუსთავში, ქუჩაში იპოვეს, თავად პროკურორს და მის ავტომობილს კი სამართალდამცავები 4 დღის განმავლობაში ეძებდნენ.