ზუგდიდში სამარშრუტო ტაქსის მძღოლების აქციაზე ფიზიკური დაპირისპირება მოხდა

საზოგადოება - 13:45, 16 Jan, 2016

3075

ზუგდიდში ყოფილი ავტოსადგურის ტერიტორიაზე საქალაქთაშორისო სამარშუტო ტაქსების მძღოლები საპროტესტო აქციას მართავენ. მძღოლები თურქული კომპანიის „მეტრო ჯორჯიას“ მიერ ახალი სამარშუტო ტაქსების შემოყვანას აპროტესტებენ.

ადგილზე დაპირისპირებასაც ქონდა ადგილი, მძღოლები რამდენიმე მამაკაცს დაუპირისპირდნენ, რომლებიც ოფიციალურად კომპანიის წარმომადგენლები არ იყვნენ, თუმცა მათივე განცხადებით, ისინი კომპანიის ხელმძღვანელობისგან იყვნენ დაქირავებულნი. სიტყვიერი დაპირისპირება ფიზიკურ დაპირისპირებაშიც გადაიზარდა, რის გამოც დაზიანდა ტერიტორიაზე მდებარე კედელი. ინციდენტის გამო ამჟამად აქციის მონაწილე 3 ადამიანი ზუგდიდის პოლიციაში დაკითხვაზე იმყოფება.

მძღოლების განცხადებით, იმ შემთხვევაში თუ ხელისუფლება მათ მოთხოვნებს არ გაითვალისწინებს, ისინი აღნიშნული კომპანიის წინააღმდეგ პარტიზანულად იმოქმედებენ და მათ მიკროავტობუსებს დააზიანებენ. მძღოლების თქმით, მათ იციან, რომ აღნიშნული ქმედება დანაშაულია, თუმცა უკიდურესი სოციალური პირობების გამო მათ სხვა გზა არ აქვთ, რადგან მათი ოჯახები შემოსავლის გარეშე რჩებათ და ამასთანავე მათ კრედიტები აქვთ ბანკებშიც.

ადგილზე „მეტრო ჯორჯიას“ წარმომადგენლები არ გამოჩენილან.