საქართველოს წითელი ჯვრის საზოგადოებამ თბილისის მერიასა და ვაკის გამგეობასთან ერთად, 13-14 ივნისის სტიქიით დაზარალებულ ოჯახებს საოჯახო ტექნიკა გადასცა. საყოფაცხოვრებო ტექნიკა თბილისის მერიის განკარგულებით დამტკიცებულმა სტიქიით დაზარალებულმა 234 ოჯახმა მიიღო.

დაზარალებულებს ტექნიკა თბილისის მერის მოადგილემ ირაკლი ლექვინაძემ, ვაკის რაიონის გამგებელმა ნოდარ ტურძელაძემ და საქართველოს წითელი ჯვრის საზოგადოების პრეზიდენტმა ნათია ლოლაძემ გადასცეს.

„წითელი ჯვრის საზოგადოების ორგანიზებითა და კერძო დონორების მხარდაჭერით, დღეს სტიქიით დაზარალებულ ყველა ოჯახს გადაეცა საყოფაცხოვრებო ტექნიკა. ეს არის კიდევ ერთი მხარდაჭერა ამ ადამიანების მიმართ. თბილისის მერიის მიერ პრაქტიკულად დასრულებულია საცხოვრისით უზრუნველყოფის ნაწილი. 50 ოჯახს მიღებული აქვს შესაბამისი კომპენსაცია და ეს შეადგენს 15 მილიონ ლარზე მეტს. გარდა ამისა, აქტიურად მიმდინარეობს მეორე კატეგორიის დაზარალებული ოჯახების სახლების რეაბილიტაციის პროცესი, ასევე ბოლო გადაწყვეტილებით, ყველა დაზარალებულ მოქალაქეს, რომლებიც იმყოფებოდა სტიქიის ზონაში და დაუზიანდა ავტომობილი, ისინი მიიღებენ შესაბამის ანაზღაურებას“, - განაცხადა ირაკლი ლექვინაძემ.

სტიქიით დაზარალებულთათვის საყოფაცხოვრებო ტექნიკა შეიძინეს შემდეგმა კომპანიებმა: ბანკი რესპუბლიკა, BP საქართველო, ვიმ-ბილ-დან საქართველო, Delloite, KPMG.