გმირთა მოედანზე მემორიალთან უკვე 20 დღეა აფხაზეთის ომის ვეტერანი გიორგი ხიზანიშვილი შიმშილობს.

ის ვეტერანთა საქმეების სახელმწიფო სამსახურს ტყუილში ადანაშაულებს. როგორც ხიზანიშვილი ამბობს, შიხიაშვილის უწყება მას მკურნალობის დაფინანსებას დაჰპირდა, მაგრამ პირობა არ შეასრულა.

„მკურნალობა-რეაბილიტცია არ ჩაგვტარებია. შიხიაშვილმა მომატყუა. მხოლოდ სამუშაოზე დასაქმებით გადამატარა, ეს ჩემთვის უარესი იყო და ამიტომ მივატოვე. ინვალიდი თუ დავრჩი, მერე აღარც მაგათი კომპენსაცია მინდა და აღარც არაფერი. მე დღეს მჭირდება ის თანხა, რაც შემპირდნენ და მომატყუეს“, - განაცხადა ხიზანიშვილმა "რუსთავი 2"-თან საუბრისას.

ვეტერანთა საქმეების სახელმწიფო სამსახურში განმარტავენ, რომ ხიზანიშვილი უწყებაში დასაქმებული იყო, მაგრამ მან სამსახური საკუთარი ნებით დატოვა. რაც შეეხება მკურნალობის დაფინანსებას, როგორც შიხიაშვილის უწყებაში აცხადებენ, ომის ვეტერანმა მათ შესაბამისი განცხადებით უნდა მიმართოს და დაფინანსება სწორედ ამის შემდეგ მოხდება.