წყალსადენის დიდი მაგისტრალის დაზიანების გამო თბილისის ნაწილს წყალმომარაგება შეუწყდება

საზოგადოება - 11:46, 12 Jan, 2016

8615

წყალმომარაგების სანიტარული ზონების დარღვევის შედეგად, ავარიულად დაზიანდა 1200 მმ-იანი მაგისტრალური წყალდენი. კომპანია „ჯორჯიან უოთერ ენდ ფაუერმა“, იანვრის დასაწყისიდან, დედაქალაქში, ამ ტიპის დაზიანების კიდევ ერთი შემთხვევა დააფიქსირა. ფოლადის მაგისტრალის ერთ-ერთი მონაკვეთი, რომელიც სოფელ დიღომში გადის, ქვის საამქროს მიმდებარედ, ბეტონის საფარქვეშაა მოყოლილი და წლებია, არასათანადო დატვირთვის ქვეშ ფუნქციონირებს, რამაც მილის დეფორმაცია და, საბოლოო ჯამში, დაზიანება გამოიწვია.

„ჯორჯიან უოთერ ენდ ფაუერი“ წყალსადენის 1200 მმ-იან მაგისტრალზე გადაუდებელი აღდგენითი სამუშაოების განხორციელებას დღეს, საღამოს 7 საათიდან შეუდგება და ხვალ დილის 8 საათზე დაასრულებს.

შესაბამისად, დღეს, 19:00 საათიდან ხვალ, 13 იანვრის დილის 08:00 საათამდე წყალმომარაგება შეუწყდება:

დიღომი-8-ს, ბელიაშვილისა და ლუბლიანას ქუჩების ნაწილს, ჟვანიას კლინიკის ტერიტორიას, აშშ-ის საელჩოს, მტკვრის მარჯვენა სანაპიროზე მდებარე ობიექტებს, ჰიპერმარკეტ „გუდვილის“ მიმდებარე ქუჩებს, ასევე მთაწმინდის რაიონის ქუჩების ნაწილს.

ღამის 12 საათიდან 13 იანვრის დილის 08:00 საათამდე კი წყლის მიწოდება შეუწყდება:

ვაკისა და საბურთალოს რაიონების ქუჩების ნაწილს.

წყლის მიწოდება ეტაპობრივად აღდგება 13 იანვრის დილის 8 საათიდან. წყალმომარაგების შეწყვეტისა და აღდგენის თაობაზე ინფორმაციას “ჯორჯიან უოთერ ენდ ფაუერი“ მომხმარებელს წინასწარ, SMS-შეტყობინების სახით, მიაწოდებს. დეტალური ინფორმაციის მოძიება ასევე შესაძლებელია კომპანიის ცხელი ხაზის - 293 11 11, ფეისბუქისა და ვებგვერდის http://www.gwp.ge/ka/gadaudebeli მეშვეობით.

„ჯორჯიან უოთერ ენდ ფაუერი“ შექმნილი დისკომფორტისთვის ბოდიშს უხდის მომხმარებელს და შეეცდება სამუშაოების ჩატარება შესაძლებლად მოკლე დროში დაასრულოს.