ლიონელ მესი "ოქროს ბურთის" მფლობელი მეხუთედ გახდა

სპორტი - 22:53, 11 Jan, 2016

3222

ფიფამ "ოქროს ბურთის" მფლობელი გამოავლინა. არგენტინის ნაკრებისა და "ბარსელონას" თავდამსხმელი 28 წლის ლიონელ მესი "ოქროს ბურთს" მეხუთედ დაეუფლა.აღნიშნული ჯილდოს მოპოვებაში მესის პორტუგალიელი კრიშტიანუ რონალდუ და ბრაზილიელი ნეიმარი ეცილებდნენ.

"აქ დაბრუნდე და კიდევ ერთი ოქროს ბურთი მოიგო, მას შემდეგ, რაც ზედიზედ 2 წელი კრიშტიანო რონალდოს ბენეფისს ვუყურებდი - განსაკუთრებული მომენტია. დაუჯერებელია, რომ ჩემთვის ეს მეხუთე ოქროს ბურთია, ეს უფრო მეტია, ვიდრე ბავშობაში ვოცნებობდი. მადლობა ფეხბურთს ამ შესაძლებლობისთვის"- განაცხადა მესიმ.

არგენტინელ ფეხბურთელს აქამდე ოქროს ბურთი 2009,2010, 2011 და 2012 წლებში ჰქონდა მოგებული.

ეროვნულ ნაკრებთა მწვრთნელებმა, კაპიტნებმა და "ფრანს ფუტბოლთან" ასოცირებულმა ჟურნალისტებმა უპირატესობა "ბარსელონას" ლიდერს მიანიჭეს. მან ხმების 41,33% მიიღო. დაჯილდოებაზე გამოვლინდა საუკეთესო მწვრთნელიც. აღნიშნულ ნომინაციაში "ბარსელონას" მთავარმა მწვრთნელმა 45 წლის ლუის ენრიკემ გაიმარჯვა.
საუკეთესო გოლის ნომინაციაში ბრაზილიელი ფეხბურთელის, უენდელ ლირას გოლმა გაიმარჯვა. სიმბოლური ნაკრებში კი შემდეგი ფეხბურთელები მოხვდნენ: მანუელ ნოიერი (ბაიერნი), დანი ალვეში (ბარსელონა), ტიაგო სილვა (პსჟ), სერხიო რამოსი (რეალი), მარსელო (რეალი) ანდრეს ინიესტა (ბარსელონა), ლუკა მოდრიჩი (რეალი), პოლ პოგბა (იუვენტუსი) კრიშტიანო რონალდო (რეალი), ლიონელ მესი (ბარსელონა) და ნეიმარი (ბარსელონა).