გუდაურში ტრაგიკულად გარდაცვლილი 12 წლის გოგონა სალომე ტატიშვილია, რომელიც თბილისის მე-6 საავტორო სკოლის მოსწავლე იყო. გარდაცვლილი გოგონას ფოტოს სკოლა ფეისბუქის ოფიციალურ გვერდზე აქვეყნებს:

,,მოულოდნელი ტრაგიკული შემთხვევის შედეგად დაიღუპა სალომე ტატიშვილი, ჩვენი სკოლის VII კლასის ყველაზე გამორჩეული, ყველაზე ლამაზი, ყველაზე ნიჭიერი და ჭკვიანი სალომე. მთელი სკოლისთვის ეს განუზომელი ტკივილია, რომელსაც სიტყვები ვერ გამოხატავს...“

უბედური შემთხვევა გუდაურში გუშინ მოხდა. გოგონას ახალგაზრდა მამაკაცი დაეჯახა, რომელიც დიდი სიჩქარით სრიალებდა. მოზარდი ადგილზე გარდაიცვალა. 19 წლის ახალგაზრდა კი საავადმყოფოშია გადაყვანილი. ექიმების ინფორმაციით, მისი მდგომარეობა სტაბილურად მძიმეა.

მომხდარზე გამოძიება სისხლის სამართლის კოდექსის 116-ე მუხლით მიმდინარეობს, რაც სიცოცხლის გაუფრთხილებლობით მოსპობას ითვალისწინებს.