2011 წლის მაისში, საპროტესტო აქციების დროს გარდაცვლილი პოლიციელის ვლადიმერ მასურაშვილის დედა ანა აზნაურაშვილი ეკა ბესელიას, მანანა კობახიძეს და ნანა კაკაბაძეს ქრთამის აღებაში ადანაშაულებს.

აზნაურაშვილის ინფორმაციით, მისი შვილის მკვლელი ციხიდან დროზე ადრე სწორედ ბესელიას კობახიძის და კაკაბაძის დახმარებით გამოვიდა.

დღეს გამართულ პრესკონფერენციაზე ანა აზნაურაშვილმა შვილის გარდაცვალეის დღე გაიხსენა.

„4 წელზე მეტი გავიდა იმ ავადსახსენებელი ღამიდან, როცა ჩემს თვალწინ ტელევიზიით მაყურებინეს როგორ მოკლეს ჩემი შვილი. ბურჯანაძის ერთ-ერთმა მანქანამ, რომელშიც იჯდა ალექსანდრე ბიბილური, გაიტანა ჩემი შვილი. თავად ბიბილურმაც განაცხადა, რომ მკვლელობა ჩაიდინა, ამიტომ ის უნდა დაისაჯოს და ეს ადამიანი უნდა იჯდეს ციხეში. მას 8 წელი მიესაჯა. ასევე 5 წელი პირობითი და მინდოდა, რომ ბოლომდე მჯდარიყო ციხეში. როგორც კი გავიგე, რომ პოლიტპატიმართა სია შედგა, მაშინვე მივმართე მთავარ პროკურორს და ადამიანის უფლებათა დაცვის კომიტეტს, რომ ეს ადამიანი ციხიდან არ გამოეშვათ, მაგრამ ყური არავინ მიგდო. ამ ყველაფრის მერე ამ ზნედაცემულმა ხალხმა, რომლებსაც სძლია სიხარბემ, გამორჩენის მიზნით ეს ყველაფერი გააკეთეს და ბიბილური ციხიდან გამოუშვეს. ამ სამმა ქალბატონმა, ბესელიამ, კაკაბაძემ და კობახიძემ არ იღო ყურად ჩემი, შვილმკვდარი დედის თხოვნა და პირიქით, მასხარად ამიგდეს. მე ვარ პოლიციელის დედა და მთელ საქართველოს ვეუბნები, ჩემი შვილი მოკლეს და ჩემი შვილის მკვლელის ციხიდან გამოშვებას ასე არ დავტოვებ“, - განაცხადა აზნაურაშვილმა.