ჩოხატაურსა და ლანჩხუთში სოციალური სააგენტოს ხელმძღვანელები 31 დეკემბერს გაათავისუფლეს

საზოგადოება - 22:24, 07 Jan, 2016

3052

31 დეკემბერს ლანჩხუთსა და ჩოხატაურში სოციალური სააგენტოს ხელმძღვანელებს უფლებამოსილება შეუწყვიტეს. სამსახურიდან გაშვების კონკრეტულ მიზეზებზე, მაკა გოგიჩაიშვილი და ზურიკო კალანდაძე არ საუბრობენ. სააგენტოს რეგიონალური სამსახურის უფროსი, ვასილ ხომერიკის განცხადებით ეს ჩვეულებრივი პროცესია, რომელიც ნებისმიერ სამსახურში შეიძლება მოხდეს. მისივე განმარტებით, ეტაპობრივად ხდება სამსახურის ხელმძღვანელების კვალიფიკაციის შესწავლა და ამის საფუძველზე კონკრეტული გადაწყვეტილების მიღება:

"ლანჩხუთსა და ჩოხატაურში ჩვეულებრივად აგრძელებს სააგენტო მუშაობას, ყველა თანამშრომელი ჩვეულებრივ რეჟიმში ჩართულია სამუშაო პროცესებში, უბრალოდ ორივე მუნიციპალიტეტში სააგენტოს ჰყავს მოვალეობის შემსრულებლები. ლანჩხუთში უფროსის მოვალეობას ასრულებს ეკატერინე წილოსანი, მანამდე სააგენტოს მთავარი სპეციალისტი და ჩოხატაურში ილია კილასონია"-განაცხადა ხომერიკმა.

მიღებულ გადაწყვეტილებას მოულოდნელს უწოდებს მაკა გოგიჩაიშვილი, რომელიც ლანჩხუთის სოციალურ სააგენტოს 2012 წლიდან, 3 წელი ხელმძღვანელობდა:

"31 დეკემბერს შემიწყვიტეს უფლებამოსილება. მოულოდნელი იყო ნამდვილად. ვერ ვხსნი რა მოხდა, ძალიან კარგად გავიარე ტესტირება და გასაუბრებაზე დამიწუნეს. გაურკვევლობაში ვარ, რადგან არასოდეს არავის ამ წლების განმავლობაში ჩემთან პრეტენზია არ ჰქონია". ჩოხატაურის სააგენტოს ხელმძღვანლის მოვალეობის შემსრულებელი ილია კილასონია კი გვეუბნება, რომ მას არა აქვს ზუსტი ინფორმაცია გათავისუფლებულია თუ არა სამსახურიდან ზურიკო კალანდაძე: "მე ვიცი, რომ ზურიკო აბარებს გამოცდებს და სანამ არ დასრულდება ეს პროცესები, მანამ მე შევასრულებ მოვალეობას".