ზუგდიდის რაიონის სოფელ ნარაზენში უხვი ნალექის გამო გადაადგილების პრობლემა შეიქმნა. როგორც ადგილობრივებმა „ნიუპოსტთან“ საუბარში განაცხადეს, სოფელში თოვლის საფარი ნახევარ მეტრს აღწევს. ნარაზენის მაცხოვრებლების ინფორმაციით, სოფელში გზების გაწმენდა არ ხდება, რის გამოც ავტომობილით გადაადგილება შეუძლებელია.

„სოფელში გადაადგილება გვიჭირს. არ ხდება გზების გაწმენდა. ამის გამო მაღაზიებში პროდუქტის შემოტანა ვეღარ ხერხდება. თუ არ მოგვხედეს მშივრები დავიხოცებით. სოფელი პარალიზებულია. ვითხოვთ დახმარებას“, - ამბობენ „ნიუპოსტთან“ საუბარში ადგილობრივები.

როგორც „ნიუპოსტს“ ზუგდიდის მუნიციპალიტეტის გამგეობაში განუცხადეს, ნარაზენში გზების გასაწმენდად ინტენსიური სამუშაოები მიმდინარეობს.

„ზუგდიდის მუნიციპალიტეტის გამგეობაში შექმნილია საგანგებო შტაბი, რომელიც 24 საათის განმავლობაში მუშაობს. ჩვენს მუნიციპალიტეტში შემავალ 48 სოფელში გაგზავნილია მძიმე ტექნიკა და მიმდინარეობს აქტიური გაწმენდითი სამშაოები. რაც შეეხება ნარაზენს, არ ვადასტურებთ ინფორმაციას, რომ იქ გაწმედნდითი ტექნიკა არ ყოფილა. შემიძლია დანამდვილებით ავღნიშნო, რომ გუშინ იქ იყო გაწმენდითი ტქნიკა, თუმცა გვიან ღამით კვლავ მოთოვა და დაითოვლა იქაურობა. კიდევ ერთხელ ვაცხადებ, რომ ზუგდიდის მუნიციპალიტეტის 5 სოფელში, ზედა ეწერში, ტყაიაში, ჩხორიაში, რიყეში და ჭკადუაშში გზებზე მოძრაობა შეზღუდულია. ამ სოფლებში მიმდინარეობს ინტენსიური მუშაობა. რაც შეეხება ნარაზენს იქ ვიმყოფებოდით ცოტა ხნის წინ. გეტყვით, რომ მოსახლეობა ბირჟაზე იდგა იმის ნაცვლად, რომ საკუთარი ტროტუარები დაეწმინდა“, - ამბობენ გამგეობაში.