ესტონურმა კომპანიამ საფეხბურთო სკოლა „ოლიპმის“ სტადიონის დემონტაჟი დაიწყო. „საბა პლუსის“ წარმომადგენლები ადგილზე დილის 07:00 საათზე მივიდნენ. როგორც კომპანიაში აცხადებენ, მათ სამუშაოს დაწყების ნებართვა აქვთ.

„ეს ტერიტორია არც საფეხბურთო სკოლას და არც იმ პირების, ვინც მას იჩემებს, არ ეკუთვნით. ეს ტერიტორია სახელმწიფოს საკუთრება იყო, შემდეგ გაიყიდა აუქციონის გზით, იყიდა კერძო პირმა და შემდეგ მისგან ვიყიდეთ ეს 2007 წელს“, - ამბობს „საბა პლუსის“ წარმომადგენელი კონსტანტინე ხუჭუა.

განსხვავებული პოზიცია აქვთ „ოლიმპის“ ხელმძღვანელობას, რომელიც სასამართლოში სარჩელი შეტანას გეგმავს.

„დილის 07:00 საათზე დაცვამ დაგვირეკა და მითხრა, შემოვიდნენ და ანგრევენ ტერიტორიასო. მერიას თხოვნით მივმართე, რომ ეს არ გაეკეთებინათ, მაგრამ არაფერი გამოვიდა“, - ამბობს სპორტკომპლექს „ოლიმპის“ დირექტორი ანდრო ცინცაძე „რუსთავი 2“-თან საუბრისას.

როგორც ცნობილია, ტერიტორიაზე საცხოვრებელი სახლის აშენება იგეგმება. ჯერჯერობით უცნობია, სად განაგრძობს ვარჯიშს 350 ბავშვი. არსებული ინფორმაციით, მოლაპარაკებები ალტერნატიული ფართის გამოყოფაზე მიმდინარეობდა, თუმცა შეთანხმება მიღწეული არ არის.