ოთხი დღეა გურიაში გადაუღებლად თოვს. თოვლის საფარი მაღალმთიან სოფლებში ერთ მეტრს აღწევს, ქალაქსა და დაბლობში კი ნახევარ მეტრზე მეტია.

უხვმა ნალექმა არა მარტო გადაადგილების, არამედ ელექტროენერგიის უწყვეტად მიწოდების კუთხით სერიოზული პრობლემები შეუქმა ადგილობრივ მოსახლეობას.

წუხელ მთელი ღამის განმავლობაში რამდენიმე უბანი ელექტროენერგიიის გარეშე იყო დარჩენილი.

გარდა ამისა, დაზიანდა რამდენიმე შენობა. ძველი საავადმყოფოს შენობის ერთ ნაწილზე ჩამოინგრა სახურავი, ოზურგეთის კულტურისა და დასვენების პარკში კი ჩამოინგრა ერთ-ერთი ატრაქციონი, ე.წ ავტოდრომი.

უამინდობის გამო ზოგიერთ სოფელში ამ დრომდე შეუძლებელია მსუბუქი ავტომანქანით გადაადგილება.

გადაუღებელი თოვლისა და ქარის გამო, პრობლემა შეიქმნა ელექტროენერგიის მიწოდებაზეც. 2 დღის განმავლობაში რამდენიმე სოფელი ელექტროენერგიის გარეშე იყო დარჩენილი. როგორც "ენერგო პრო ჯორჯიას" ადგილობრივი სერვისცენტრის ხელმძღვანელმა, გია ნაკაიძემ აღნიშნა, ბოლო დღეებში 24 საათიან რეჟიმში მუშაობდნენ ტექნიკოსები, ამ დროისთვის პრობლემა ოზურგეთის სოფლებში მთლიანად აღმოფხვრილია.

მუნიციპალიტეტის გამგეობის ინფორმაციით, ისინი საგანგებო რეჟიმში მუშაოებენ და ყველა რესურსის გამოყენება ხდება, რომ შექმნილი პრობლემები უმოკლეს დროში გადაიჭრას.

ქალაქის მერის განმარტებით კი, ამ დროისთვის ქალაქის ტერიტორიაზე მთლიანად გაწმენდილია გზები და ავტომანქანები შეუფერხებლად გადაადგილდებიან.