პრეზიდენტმა და პირველმა ლედიმ შეზღუდული შესაძლებლობების მქონე ბავშვებს უმასპინძლეს

საზოგადოება - 17:59, 04 Jan, 2016

2678

პრეზიდენტის ნაძვის ხეზე პრეზიდენტმა გიორგი მარგველაშვილმა და პირველმა ლედიმ, მაკა ჩიჩუამ დღის ცენტრებიდან შეზღუდული შესაძლებლობების მქონე ბავშვებს და პრეზიდენტის ადმინისტრაციის თანამშრომლების შვილებს უმასპინძლეს.
ღონისძიება საქართველოს პრეზიდენტის სასახლეში გაიმართა.

ბავშვებისთვის "ბასტი ბუბუს" ღონისძიება გაიმართა, თოვლის ბაბუამ კი მიწვეულ სტუმრებს საახალწლო საჩუქრები გადასცა.

პირველმა ლედიმ, მაკა ჩიჩუამ დამსწრეებს ახალი წელი მიულოცა.
მისივე თქმით, დღეს ტრადიციულად პრეზიდენტის ნაძვის ხე იმართება და დღის განმავლობაში, 12:00 საათზე, 16:00 და 18:00 საათზე ტარდება ღონისძიებები.
"ბავშვებს შეუძლიათ იხალისონ "ბასტი ბუბუსთან" ერთად. ყველას გილოცავთ ახალ წელს, ბედნიერ, მშვიდობიან, კეთილ წელს გისურვებთ", - განაცხადა მაკა ჩიჩუამ.

პრეზიდენტის ადმინისტრაციის უფროსის, გიორგი აბაშიშვილის თქმით კი, საქართველოს პრეზიდენტმა გადაწყვიტა, რომ ბავშვებისთვის ახალი წლის დღეები კიდევ უფრო ლამაზი ყოფილიყო. "შესაბამისად, ბავშვები დავპატიჟეთ საახალწლო ნაძვის ხეზე და პრეზიდენტის სახელით მათ გადაეცემათ საჩუქრები. წელს საქართველოს პრეზიდენტმა სახელმწიფო მზურნველობის ქვეშ მყოფ ყველა ბავშვს გადასცა საჩუქრები", - განაცხადა აბაშიშვილმა.