თბილსერვისის ოფისთან დასუფთავების სამსახურის თანამშრომლების საპროტესტო აქცია მიმდინარეობს. გაფიცული თანამშრომლები ხელფასების 50%-იან ზრდას ითხოვენ. ამის მიზეზად ისინი ლარის გაუფასურებას ასახელებენ.

ადგილზე შეკრებილები თბილსერვისის ხელმძღვანელობის მხრიდან ზეწოლაზეც საუბრობენ. მათი თქმით, გაფიცვის შემთხვევაში ხელმძღვანელობა სამსახურიდან დათხოვნით ემუქრება.

„უფროსმა დამირეკა გუშინ და მითხრა, თუ აქციაზე გახვალ ჩათვალე, რომ სამსახური აღარ გაქვსო. არ მეშინია მათი“, - ამბობს აქციის ერთ-ერთი მონაწილე „რუსთავი 2“-თან საუბრისას.

თბილსერვისის ადმინისტრაციაში ზეწოლას უარყოფენ და აცხადებენ, რომ მოლაპარაკებებისთვის მზად არიან.