თბილისის მერია დღეს დაგეგმილი საახალწლო ღონისძიებების განრიგს აქვეყნებს

საზოგადოება - 13:22, 29 Dec, 2015

3044

29 დეკემბერს, საახალწლო ქალაქი თბილისელებს და ქალაქის სტუმრებს 12 საათიდან უმასპინძლებს. ჯადოსნური ქალაქის სტუმრებს, საშუალება ექნებათ, საგანგებოდ მოწყობილ და მორთულ სახლებში, მთელი დღის განმავლობაში, დააგემოვნონ გლინტვეინი, კრეპები, ორცხობილები, „ბელგიური ვაფლი“ და სხვა საახალწლო ნუგბარი; შეიძინონ სუვენირები, ნაძვის ხის სათამაშოები და ხელნაკეთი ნივთები. გადაიღონ ფოტო სურათები დროში მოგზაურ სანტასთან ერთად.

გარდა კულტურული ღონისძიებისა საახალწლო ქალაქი დატვირთული იქნება სპორტული და საბავშვო აქტივობებით. მსურველებს საშუალება ექნებათ თვალყური ადევნონ ქუჩის კალათბურთის მატჩებს, სხვადასხვა შოუებს ბატუტზე და პარკურს. ვარდების მოედანზე პანტომიმის თეატრის მსახიობები პერფორმანსებს გამართავენ.

ქალაქის მცირეწლოვან სტუმრებს, საბავშვო ზონაში, ანიმატორები, მასკოტები, ჯამბაზები და ზღაპრის გმირები უმასპინძლებენ. აქტიური თამაშების ზონაში, პატარებს საშუალება ექნებათ ითამაშონ მაგიდის ფეხბურთი, მგიდის ჰოკეი, ტეზერბოლი, დართსი და სხვა თამაშები. გაიმართება ელფების მსვლელობა. საახალწლო ქალაქში, საგანგებოდ მოწყობილ, არტ სახლში, გამოიფინება ხელნაკეთი ნივთები. მოეწყობა თოჯინური თეატრის წარმოდგენები.

საახალწლო ქალაქში, საგანგებოდ დამონტაჟდება სცენა, სადაც, ყოველდღიურად სხვადასხვა ჟანრის კონცერტები და DJ-ების ფესტივალი გაიმართება.

ვარდების რევოლუციის მოედანზე საახალწლო ქალაქი 25 დეკემბრიდან ფუნქციონირებს. კულტურული, სპორტული თუ საბავშვო აქტივობები ვარდების მოედანზე 3 იანვრამდე გასტანს. 10 დღის განმავლობაში, თბილისელებისა და ქალაქის სტუმრებისთვის საახალწლო განწყობის შექმნას, წელს 700 ზე მეტი მუსიკოსი, მსახიობი და შემსრულებელი შეეცდება.