სემეკის შენობასთან „ენერგო პრო-ჯორჯიას“ თანამშრომლებმა საპროტესტო აქცია გამართეს. ისინი დაბალ ანაზღაურებას აპროტესტებენ და ამბობენ, რომ ამასთან ერთად მათ რთულ პირობებში უწევთ მუშაობა.

როგორც აქციის მონაწილეები ამბობენ, კომპანიას გააჩნია იმის რესურსი, რომ მათ ეს პრობლემები მოეხსნათ. ისინი სემეკს და „ენერგო პროს“ ხელმძღვანელობას საკითხით დაინტერესებისაკენ მოუწოდებენ.

„ჩვენი მოთხოვნაა შრომითი უფლებების სათანადოდ დაცვა და ხელფასების ანაზღაურების საკითხი, რაც უნდა გადაწყდეს. ჩვენი მოთხოვნაა, რომ 17 მილიონი დამატებით ჩაიდოს წლიურ ბიუჯეტში, რაც 25%-იან სახელფასო ზრდას გამოიწვევს“, - განაცხადა ენერგეტიკის მუშაკთა პროფკავშირების თავმჯდომარე ამირან ზენაიშვილი „კურიერთან“ საუბრისას.

საქართველოს ენერგეტიკისა და წყალმომარაგების მარეგულირებელი ეროვნული კომისია „ენერგო პრო-ჯორჯიას“ აბონენტებისთვის ტარიფის დადგენაზე მსჯელობს.

მიუხედავად იმისა, რომ რეგიონის მოსახლეობისთვის ტარიფი 2017 წლამდე უკვე განსაზღვრულია, სემეკში ამბობენ, რომ არსებობს მექანიზმი, რომლის მეშვეობით ტარიფის ყოველწლიური გადახედვაა შესაძლებელი. მათივე ინფორმაციით, ტარიფის ზრდა სავარაუდოდ, მოსალოდნელი არ არის.