ქართველი მორაგბეები სიტუაციის დროულად განმუხტვას და სამართლიან არჩევნებს ითხოვენ

სპორტი - 14:32, 22 Dec, 2015

1841

არაოფიციალური ინფორმაციით რაგბის კავშირის საპრეზიდენტო არჩევნები შესაძლოა 24 იანვარს გაიმართოს. არჩევნების კონკრეტულ თარიღს კავშირის საბჭოს სხდომაზე რამდენიმე დღეში გამოაცხადებენ. დღეს სასტუმრო რუმსში რაგბში მიმდინარე პროცესების შესახებ იმსჯელეს. შეხვედრა ქართული საზოგადოება "ქართული სპორტის" ინიციატივით გაიმართა. მორაგბეებმა დღეს სპეციალური განცხადებაც გააკეთეს. ისინი თვლიან, რომ რაგბიში არსებული მდგომარეობა დროულად უნდა განიმუხტოს და საპრეზიდენტო არჩევნებში მონაწილეობის უფლება ყველა მსურველს უნდა მიეცეს. შეხვედრას ნაკრების ყოფილი კაპიტნები ილია ზედგინიძე და ირაკლი მაჩხანელი უძღვებოდნენ. შეხვედრას სკაიპით ჩაერთო დავით ზირაქაშვილიც.

”უაღრესად უკმაყოფილო ვარ იმით, თუ როგორ წარიმართა დღევანდელი შეხვედრა. ჩემი აქ მოსვლის მიზანი იყო, საუბარი იმის შესახებ, თუ როგორ შეიძლება განვითარდეს ქართული რაგბი და ვფიქრობ ჩვენ ბევრი მუშაობა დაგვჭირდება, რათა განვითარება შევძლოთ.პროცესი რეალურად დაძაბულობისკენ წავიდა, რაც დამღუპველია. ამ ნაბიჯების გადადგმა ამ შეხვედრაზე არ დაწყებულა. არვიცი გარე ძალა გვებრძვის თუ ვიღაცას უნდა, რომელსაც სულ არ აინტერესებს რაგბის კეთილდღეობა თავის სასარგებლოდ გამოიყენოს რაგბის ოჯახის პოპულარობა და ამ სპორტის სახეობის წინსვლა, ეს გამორიცხული არ არის.არსებული სიტუაციიდან გამოსავალი კომუნიკაციაა. აუცილებლად უნდა აღდგეს კომუნიკაცია, რომელიც ჩემი აზრით არ არის საკმარი"- განაცხადა ილია ზედგინიძემ.

მორაგბე პალიკო ჯიმშელაძის თქმით ირაკლი აბუსერიძეს სხვისი დახმარება არ სჭირდება, რადგან მას რაგბის სამყაროში საკმარისი ავტორიტეტი აქვს:

„ვერ ვხვდები რაში ჭირდება ირაკლი აბუსერიძეს გაპოლიტიზირება, იმიტომ რომ რაგბის სამყაროში დაიბადა და გაიზარდა . ვინ დაიწყო და რატო დაიწყეს ამ თემაზე ლაპარაკი? ვინც რაგბში ჩახედულია ის არ იფიქრებს იმას რომ აბუსერიძეს ვინმეს დახმარება ან ჩარევა დასჭირდება“- განაცხადა ჯიმშელაძემ.