დღეს, 12:00 საათზე „ბილაინის“ ახალი კონცეფციის გაყიდვების ოფისში, სერვისების განვითარების სააგენტოსა და შპს „მობიტელს“ შორის ხელშეკრულება გაფორმდა. ხელშეკრულებას ხელი სახელმწიფო სერვისების განვითარების სააგენტოს თავმჯდომარემ შიო ხეცურიანმა და „ბილაინის“ გენერალურმა დირექტორმა გიორგი ტყეშელაშვილმა მოაწერეს.

აღნიშნული მომსახურებით, მომხმარებლებს საშუალება მიეცემა, მობილური ოპერატორის სერვისები გაცილებით მარტივად და სწრაფად მიიღონ. ასევე ორგანიზაციას საშუალება ექნება შექმნას მომხმარებლის ელექტრონული ხელმოწერის ბიომეტრიული მონაცემების შემცველი ელექტრონული დოკუმენტი და დაადასტუროს ზუსტად რა დროს მოაწერა პირმა დოკუმენტს ხელი.

„სერვისების განვითარების სააგენტომ ამ ინოვაციური პროდუქტის მხარდამჭერი სერვისის, კერძოდ დროის აღნიშვნის შეთავაზება უკვე დაიწყო კერძო სექტორის იმ წარმომადგენლებისთვის, ვინც თანამედროვე ტექნოლოგიების დანერგვასა და მომხმარებლისთვის კომფორტის შექმნაზეა ორიენტირებული. ეს მომსახურება კომპანიებს საშუალებას მისცემს მნიშვნელოვნად შეამცირონ მომსახურების დრო, რაც მომხმარებლისთვის ძალიან მოსახერხებელია” - განაცხადა სახელმწიფო სერვისების განვითარების სააგენტოს თავმჯდომარემ შიო ხეცურიანმა.

მნიშვნელოვანია ის, რომ ელექტრონული ხელმოწერის ბიომეტრიული მონაცემების შემცველი დოკუმენტი საშუალებას იძლევა ექსპერტიზა ჩაუტარდეს ფიზიკური პირის ელექტრონულ ხელმოწერას და განხორციელდეს ხელმომწერი პირის იდენტიფიცირებაც.

”ჩვენ მოხარულები ვართ, რომ მოგვეცა საშუალება აბონენტებისთვის შეგვეთავაზებინა კიდევ ერთი ჩვენი ახალი კონცეფციის გაყიდვების ოფისი, ციფრული თანამედროვე ტექნოლოგიების სადემონსტრაციო სივრცე, სადაც სახელმწიფო სერვისების განვითარების სააგენტოს დახმარებით მომხმარებელს შევთავაზებთ ინოვაციურ ციფრულ მომსახურებას, რაც საშუალებას მოგვცემს, ჩვენმა აბონენტებმა ჩვენი სერვისები კიდევ უფრო მარტივად და სწრაფად მიიღონ ” - განაცხადა ბილაინის გენერალურმა დირექტორმა გიორგი ტყეშელაშვილმა.