მიმდინარე თვის დასაწყისიდან, ოზურგეთში არსებული რამდენიმე სპორტული დაწესებულებებიდან სავარჯიშო გირები მოიპარეს.

ერთ-ერთი პირველი, ვინც ეს ფაქტი დაადასტურა სარაგბო კლუბ "არწივების" ხელმძღვანელი, თენგიზ კალანდაძეა.

„9 დეკემბერს ჩვენი დარბაზიდან 4 გირა მოიპარეს. აქედან 2 32-32 კგ-ს იწონიდა, 2 კი, 16-16 კგ-ს. ოთხივე ძველი გირი იყო. რაღაც ხდება აშკარად, გავიგეთ, რომ იბარებენ ძველ გირებს, მაღალ ფასებში და ალბათ ამიტომ, თორემ ვინმეს ეს სავარჯიშოდ დასჭირვებოდა და ამ მიზნით წაეღოთ, არა მგონია. მე დავრეკე თბილისში, სპორტული ინვენტარის მაღაზია „იმედში", რომელთანაც გვაქვს ხელშეკრულება გაფორმებული და 4 გირა რომ ვიყიდო, თანამედროვე, ერთი კგ-ს ფასი არის 5 ლარი. საერთო ჯამში დამიჯდება 490 ლარი. მომხდარის შესახებ შევატყობინეთ პოლიციას. ადგილზე იმყოფენოდნენ კრიმინალისტებიც“, -გვითხრა კალანდაძემ.

ჩვენს ხელთ არსებული ინფორმაციით, სავარჯიშო გირები ასევე წაღებულია ყოფილი სასპორტო სკოლიდან და ე.წ რუდოს დარბაზიდან, სადაც ასევე ძველი გირებით ვარჯიშობდნენ. ჩვენთვის ცნობილი გახდა, რომ ძველ სავარჯიშო გირებს კერძო კოლექციონერები იბარებენ და მისი ფასი შავ ბაზარზე, საკმაოდ მაღალია. სავარაუდოდ, ამას უკავშირდება გახშირებული ქურდობებიც.

შსს-ს პრესსამსახურის ცნობით, მომხდარ ქურდობების ფაქტზე მიმდინარეობს გამოძიება 177 მუხლით-ქურდობა.

თეა იოსელიანი, გურია