"გეორგია“ - გარდაბნის რაიონში ვეტერანთა პირველი სოფელი შენდება

საზოგადოება - 18:06, 16 Dec, 2015

1926

გარდაბნის რაიონში ვეტერანთა პირველი სოფლის მშენებლობა იგეგმება.ვეტერანთა სამსახურის ხელმძღვანელის ირაკლი შიხიაშვილის განცხადებით აღნიშნული პროექტი პატრიარქის იდეა იყო, ხოლო ინიცირება პრემიერ-მინისტრ ირაკლი ღარიბაშვილის მიერ მოხდა.

სოფლის აშენება 75 მილიონი ჯდება, შიხიაშვილის თქმით ეს სახლების მშენებლობას და სოფლის მეურნეობის მაღალტექნოლოგიურად მოწყობას მოხმარდება

პირველ ეტაპზე სოფელში, რომელიც აზერბაიჯანთან საზღვრის სიახლოვეს აშენდება, ვეტერანების 550 ოჯახი დასახლდება. მათ კერძო სახლები და მიწის ნაკვეთები გადაეცემათ (გაყიდვის უფლების გარეშე) და სასოფლო–სამეურნეო საქმიანობის შესაძლებლობა მიეცემათ.

ამ პროექტის შემუშავების საფუძველი ვეტერანთა შორის უმუშევრობა და საზღვრისპირა რეგიონებში არსებული მძიმე სოციალური მდგომარეობა გახდა.

პროექტში მონაწილეობის სურვილი, რომელიც „ვეტერანთა კოოპერატიულმა სასოფლო–სამეურნეო გაერთიანებამ“ დაამუშავა, ვეტერანთა 20 ათასამდე ოჯახმა გამოთქვა. ოჯახებს ვეტერანთა სამსახური და ებრაული კომპანია „ფორტუნა ჰოლდინგი“ შეარჩევს, „ფორტუნა ჰოლდინგის“ შემადგენლობაში შედის სავაჭრო ქსელი „ლიდლი“. კომპანია „ლიდლი“ მომავალში გასაყიდად ჩაიბარებს ვეტერანთა ოჯახების მიერ მოყვანილ მოსავალს. ამას გარდა, ვეტერანები კომპანიის მაღაზიათა ქსელში 30%–იანი ფასდაკლებით ისარგებლებენ.