2008 წლის 16 დეკემბერს მსახიობი დავით იაშვილი, იგივე იაშკა, 36 წლის ასაკში გულის შეტევით გარდაიცვალა. იგი ამსტერდამში იმყოფებოდა, სადაც სტუდენტურ კინოფესტივალში მონაწილეობდა. იაშკა, 1993 წლიდან რუსთაველის თეატრის მსახიობი იყო. მონაწილეობდა სხვადასხვა სპექტაკლებში, თუმცა განსაკუთრებული პოპულარობა კინოროლებმა მოუტანა. თამაშობდა გახმაურებულ სერიალში „სტალინი live“, მთავარი როლი ჰქონდა ლევან თუთბერიძის მრავალსერიან ფილმში „ქაღალდის ტვია“. ბოლო კინოროლი მსახიობმა დიტო ცინცაძის ფილმში „მედიატორი“ შეასრულა.

იაშკას ერთ-ერთი მეგობარი, რუსთაველის თეატრის მსახიობი ბესო ზანგური, ფეისბუკში საკმაოდ ამაღელვებელ სტატუს აქვეყნებს, რომლის საშუალებითაც 7 წლის წინანდელ ემოციას გადმოსცემს. „დიდთოვლობა იყო, დიიდი თოვლი იდო და ამ დიდ თოვლს ქმარივით ეწვა ზემოდან ყინვა.... მივდივართ ამ გაუგებრობაში 4 მეგობარი აეროპორტში, ლევანიკო ზის ჩემს გვერდზე მაჭარაშვილი და სევდას გვიფანტავს, ხორთუმა სპილოს მეძახის'))) მივედით და.... გაიხსნა კარი, საშინელი რკინის კარი და,,,,იაშკას კუბო...წამოვედით და ვხსნით, და ვხსნით და თურმე ცინკია შიგნით....საშინელ ხასიათზე ვარ ყველაფერი გამახსენდა! იაშკაა!!!“- წერს ბესო ზანგური ფეისბუკის გვერდზე.