"აკრძალეთ ასაფეთქებელი სათამაშოები"- პეტიციას უკვე 4000-ზე მეტი ხელმომწერი ჰყავს

საზოგადოება - 14:07, 16 Dec, 2015

3362

მოქალაქეთა ჯგუფი ე.წ სათამაშო ასაფეთქებლების აკრძალვას ითხოვს. ამ მიზნით პეტიციაზე ხელმოწერა ხორციელდება, რომლის ადრესატებიც საქართველოს პარლამენტი , საქართველოს მთავრობა და საქართველოს პრეზიდენტი არიან:

„მოვითხოვთ, აიკრძალოს ერთი შეხედვით უწყინარი, ე.წ. სათამაშო ასაფეთქებელი საშუალებებით ვაჭრობა და მათი გამოყენება. აკრძალვა დარეგულირდეს შესაბამისი კანონის მუხლით, ან საგანგებო განკარგულებით, არ იყოს ერთჯერადი და სამართალდამრღვევი დაისაჯოს. საყოველთაოდ ცნობილია, რომ მიმდინარე წლის და ზოგადად, ბოლო წლების განმავლობაში ე.წ. „ბომბოჩკები“ გახდა ძალიან ბევრი ტრაგედიის მიზეზი. აღნიშნული გასართობი საშუალებებით დასახიჩრდა არაერთი, სხვადასხვა ასაკის პიროვნება. უკონტროლო, გართობის მიზნით აფეთქებები აღიზიანებს უამრავი ბავშვის და შეუძლოდ მყოფი, ზრდასრული ადამიანების ფსიქიკას. სამწუხაროდ, ხშირად ფიქსირდება სადიზმის გამოვლინების შემთხვევებიც, რა დროსაც ბავშვების მავნე მიდრეკილებების მსხვერპლი ხდებიან ცხოველები. ხშირია მათი წამების ფაქტები.

აღნიშნული, სრულიად საკმარისი მიზეზების გამო მოვითხოვთ, ასაფეთქებელი საშუალებები უკიდურეს შემთხვევაში გამოიყენონ მხოლოდ ახალი წლის ღამით. სხვა შემთხვევაში ჩაითვალოს საზოგადოებრივი წესრიგის, მშვიდობიანი მოქალაქეებისთვის სიმშვიდის და მათი უფლებების დარღვევად.“- აღნიშნულია პეტიციის ტექსტში. ამ დროისთვის პეტიციას 4 000-ზე მეტი ხელმომწერი ჰყავს, საერთოდ კი 10 000 ხელმოწერაა საჭირო.