„ნიჭიერმა“ კიდევ ერთი რეკორდი მოხსნა და გუშინ (14 დეკემბერს) ზემაღალი რეიტინგი მიიღო- 33,7. ეს არ არის შოუ, რომელიც მაყურებელს ყოველთვის საუკეთესო სანახაობას სთავაზობს. ყოველივე კი, რა თქმა უნდა, პირველ რიგში რეიტინგზე აისახება. ტელეკომპანია რუსთავი 2-ის, საერთაშორისო პროექტების აღმასრულებელი პროდიუსერი, გიორგი ხაბურზანია „ნიუპოსტის“ რამდენიმე შეკითხვას პასუხობს.

- რა კრიტერიუმით შეარჩიეთ გუშინდელი ჟიურის წევრად შალვა ნათელაშვილი და როგორ ფიქრობთ ამართლებს თუ არა ერთჯერადად მოწვეული ჟიური?

- საერთოდ როგორც წესი ჟიური რომელიც პროექტზე მუშაობს, სჯობს სტაბილურად იგივე შემადგენლობით იყოს. შალვა ნათელაშვილის შემთხვევა აბსოლუტურად სხვა სიტუაციაა. დიდი ხანია გვინდოდა ბატონი შალვა რაღაც ფორმით გვყოლოდა „ნიჭიერში“, სპეც სტუმრის სტატუსით, ერთჯერადად ან რამოდენიმეჯერ. საბოლოოდ გუშინ გამოვიდა ეს ყველაფერი, ისიც დაგვთანხმდა და შედეგიც არაჩვეულებრივი მივიღეთ. ასე რომ გამონაკლის შემთხვევებში, სპეციალურად მოწვეული ჟიურის წევრები კარგია, გააჩნია როდის და ვინ.

- „ჭოლა“ რატომ არ იყო გუშინდელ ნიჭიერში?

- ქვეყნიდან არის გასული. ვერ გადადო გასტროლი და ამიტომაც ზუსტად ამ დღეს მოვიწვით როგორც სპეციალური სტუმრი ბატონი შალვა.

- გუშინ „ნიჭიერმა“ თავისივე რეკორდი მოხსნა.

- „ნიჭიერს“ ადრეც ჰქონია მაღალი რეიტინგი, მაგრამ 33,7 ძალიან მაღალი მაჩვენებელია. ამხელა რეიტინგი არც ერთ სხვა გადაცემას არ ჰქონია, ახლოსაც კი არ არიან, ამიტომ ყოველთვის სასიამოვნოა როდესაც საკუთარ რეკორდს აუმჯობესებს. ძველით ახალ წელს არის „ნიჭიერის“ ფინალი, რის მერეც მომდევნო სეზონისთვის დავიწყებთ მზადებას და ყველაფერს გავაკეთებთ იმისთვის, რომ საუკეთესო სანახაობა და პროექტი მივიტანოთ მაყურებლამდე.