სპეციალურ ავტოსადგომზე სატრანსპორტო საშუალებების გადაყვანის შესაძლებლობები კიდევ უფრო კონკრეტდება. აღნიშნულიდან გამომდინარე, ცვლილებები შედის „საქართველოს ადმინისტრაციულ სამართალდარღვევათა კოდექსში“, რომლის განხილვაც ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე მოეწყო. საკითხის ინიციატორის, პარლამენტის წევრის, სოსო ჯაჭვლიანის ინფორმაციით, მოქმედი კანონიდან ამოდის „თუ ქმნის საავარიო სიტუაციას“ ჩანაწერი, რაც „სითი პარკს“ სატრანსპორტო საშუალების ევაკუირების შესაძლებლობას აძლევდა. მისივე განცხადებით, წარმოდგენილ კანონპროექტს დაემატება ჩანაწერი, რომლის მიხედვითაც „სითი პარკს" აეკრძალება ავტომობილის სპეციალურ სადგომზე გადაყვანა თუ ის ამკრძალავი ნიშნის „დგომა-გაჩერება აკრძალულია“ ან „დგომა აკრძალულია“ მოთხოვნას არღვევს, მაგრამ არ აფერხებს საავტომობილო მოძრაობას და არ ქმნის საცობს.

კომიტეტის თავმჯდომარის, ეკა ბესელიას შეფასებით, კომიტეტისთვის მისაღებია წარმოდგენილი ცვლილებები, თუმცა მასში ქვეითად მოსიარულეთა უფლებების დაცვაზე საუბარი არ არის, რაც უფლებრივ დისბალანსს წარმოშობს. მან საკითხის ინიციატორს პროექტში იმ მუხლის დამატების რეკომენდაციით მიმართა, რაც ავტომობილის ტროტუარზე გაჩერებისას ქვეითთა გადაადგილების შეფერხების შემთხვევაში, მის ევაკუაციას შეეხებოდა. ეკა ბესელიას განცხადებით, კანონში აღნიშნული ჩანაწერის გაკეთებით დაცული იქნება ფეხით მოსიარულეთა და განსაკუთრებით, შეზღუდული შესაძლებლობის მქონე პირთა უფლებები.

კომიტეტის ეს ერთადერთი შენიშვნა კანონპროექტის ინიციატორმა სრულად გაიზიარა და პროექტში შესაბამისი ჩანაწერით ასახა. კომიტეტის მხრიდან სხვა შენიშვნა/რეკომენდაცია საკითხის მიმართ არ გამოთქმულა. კომიტეტის თავმჯდომარის პირველი მოადგილე გედევან ფოფხაძის შეფასებით, კანონპროექტით წარმოდგენილი ცვლილებები მისთვის სრულიად მისაღებია, რადგან „სითი პარკის“ მოქმედებები მაქსიმალურ ჩარჩოებში უნდა მოექცეს. „დედაქალაქში „სითი პარკის“ შემოსვლის დღიდან ადამიანის უფლებები ტოტალურად ირღვევა და კომპანია მონსტრ ორგანიზაციად გადაიქცა, რომელიც ზემოგების სანაცვლოდ ქალაქში პარკირების მოწესრიგების უზრუნველსაყოფად ფაქტიურად არაფერს არ აკეთებს“, - განაცხადა გედევან ფოფხაძემ. კანონპროექტთან დაკავშირებით მოსაზრებები შინაგან საქმეთა სამინისტროს და არასამთავრობო ორგანიზაციათა წარმომადგენლებმაც გამოთქვეს.