ცნობილი იურისტი მზია ლეკვეიშვილი გარდაიცვალა

საზოგადოება - 13:23, 03 Dec, 2015

6518

ცნობილი ქართველი იურისტი, თბილისის სახელმწიფო უნივერსიტეტის ემერიტუსის, სისხლის სამართლის რეფორმის უწყებათაშორისი საბჭოს წევრი მზია ლეკვეიშვილი 88 წლის ასაკში გარდაიცვალა.

მზია ლეკვეიშვილი არაერთი სამეცნიერო ნაშრომის ავტორია, რომელმაც თავისი წვლილი შეიტანა სისხლის სამართლის მეცნიერების განვითარებაში; არაერთხელ იყო სისხლის სამართლის კანონმდებლობის შემმუშავებელი კომისიის წევრი − მოქმედ კოდექსსა თუ სხვა ნორმატიულ აქტებში მისი ინიციატივით არაერთი დებულებაა ასახული.

მზია ლეკვეიშვილის გარდაცვალების გამო მწუხარებას გამოთქვამენ და მისი ოჯახის წევრებს, კოლეგებსა და ახლობლებს უსამძმრებენ იუსტიციის სამინისტრო და საქართველოს მთავარმა პროკურატურა.

„საქართველოს იუსტიციის სამინისტრო მწუხარებას გამოთქვამს ცნობილი ქართველი იურისტის, თბილისის სახელმწიფო უნივერსიტეტის ემერიტუსის, სისხლის სამართლის რეფორმის უწყებათაშორისი საბჭოს წევრის, მზია ლეკვეიშვილის, გარდაცვალების გამო და სამძიმარს უცხადებს მისი ოჯახის წევრებს, კოლეგებსა და ახლობლებს.

მზია ლეკვეიშვილის გარდაცვალება დიდი დანაკლისია ქართული იურიდიული მეცნიერებისათვის, რომელმაც მისი სახით უდიდესი მკვლევარი და თეორეტიკოსი დაკარგა; იურისტთა მომავალი თაობებისათვის, რომლებიც ვეღარასოდეს მოისმენენ ქალბატონი მზიას ლექციებს; სისხლის სამართლის რეფორმებზე მომუშავე ყველა უწყებისათვის, რადგან მათ საქმიანობის გაგრძელება მზია ლეკვეიშვილის რჩევებისა და კონსულტაციების გარეშე მოუწევთ.“- აღნიშნულია იუსტიციის სამინისტროს განცხადებაში.

სამძიმრის წერილი გამოაქვეყნა მთავარმა პროკურატურამაც:

„საქართველოს პროკურატურა ღრმა მწუხარებას გამოთქვამს ცნობილი ქართველი იურისტის, თბილისის სახელმწიფო უნივერსიტეტის ემერიტუსის, სისხლის სამართლის რეფორმის უწყებათაშორისი საბჭოს წევრის, მზია ლეკვეიშვილის, გარდაცვალების გამო და სამძიმარს უცხადებს მისი ოჯახის წევრებს, კოლეგებსა და ახლობლებს.

მზია ლეკვეიშვილმა მნიშვნელოვანი წვლილი შეიტანა სისხლის სამართლის მეცნიერების განვითარებაში, აღზარდა არაერთი იურისტი და მათ შორის პროკურატურის მრავალი თანამშრომელი. მისი გარდაცვალება დიდი დანაკლისია ქართული იურიდიული მეცნიერებისათვის, უნივერსიტეტისთვის, სტუდენტებისთვის და სისხლის სამართლის რეფორმებზე მომუშავე ყველა უწყებისთვის.“- ნათქვამია უწყების განცხადებაში.