“99 წუთი გვათამაშა მსაჯმა, სანამ გოლი არ გაგვიტანეს არ დაამთავრა“- ახალი სკანდალი ქართულ ფეხბურთში

სპორტი - 16:25, 27 Nov, 2015

6608

ოზურგეთის საფეხბურთო კლუბის "მერცხალის" ხელმძღვანელობა გარიგებულ თამაშებთან დაკავშირებით ტელეკომპანია "პირველის" მიერ გავრცელებულ სიუჟეტს ეხმაურება. გულშემატკივრის ვარაუდით აბსოლუტურად უცნობი ქართული გუნდების თამაშით უცხოურ ვებსაიტების დაინტერესება იძლევა იმის საფუძვლიან ეჭვს, რომ თამაშები გარიგებული იყო. მათ შორის კი ერთ-ერთი გუნდი ოზურგეთის "მერცხალია". საეჭვო თამაშებთან დაკავშირებით საქართველოს ფეხბურთის ფედერაციამ უკვე მიმართა, როგორც უეფას, ასევე სამართალდამცავ ორგანოებს.
ნიუპოსტის რეგიონალური კორესპონდენტი ოზურგეთის „მერცხალის“ მთავარ მწვრთნელსა და კლუბის პრეზიდენტს გაესაუბრა:

„ჩვენ შინაგან საქმეთა სამინისტროდან არავინ შეგვხმიანებია, თამაშს რაც შეეხება- 99 წუთი ვთამაშობდთ მოედანზე. რამდენად შესაბამისია ეს დრო ორი ტაიმის სათამაშოდ ვერ გეტყვით, დამატებულ დროში და დამატებული დროის შემდეგაც 4 წუთი დაამატა მსაჯმა. მე ვფიქრობდი, რომ ვიდრე გოლს არ გაიტანდნენ, არ დაასრულებდნენ თამაშს, ვფიქრობ, რომ მსაჯი მიზანმიმართულად აკეთებდა ამას, თამაშიც ბოლო წუთამდე 2-2 იყო, 98 წუთზე გავიდა მესამე გოლი და იმავე წუთში დაამთავრა თამაში. ვფიქრობ ჩვენს წინააღმდეგ არის დისკრიმინაცია, ასე ხდება სხვა თამაშებზეც. წინასწარ ვერაფერს ვიტყვით“ - აცხადებს, „მერცხალის“ მთავარი მწვრთნელი, აკაკი ათუაშვილი.

რაც შეეხება კლუბ „მერცხალის“ დირექტორს, ის გარიგებული თამაშის შესაძლებლობას კატეგორიულად გამორიცხავს:

„ჯერ-ჯერობით დაკავშირება არ ყოფილა, დაინტერესებული არიან სამართალდამცავები და ველოდები მათგან შეხმიანებას. რაც შეეხება თამაშს, ცუდი მსაჯობა მინახავს, ძალიან ცუდიც, მაგრამ ასეთი არაფერი. თამაში მაშინ დამთავრდა, როცა ბურთი გავიდა. ორი პენალტი არ ჩაგვითვალეს, საერთოდ ოზურგეთის „მერცხალი“ წლევანდელ წელს შერისხულ გუნდად არის დასახელებული, მსაჯები არ გვწყალობენ, იხარჯება ბიუჯეტის ფული და თამაშს ვერასდროს ვიგებთ, ხელს გვიშლიან. მსაჯი ვიღაც გლისჩუკი იყო, ქუთაისელი, ქედაშიც არაობიექტური მსაჯობა იყო, მაგრამ ასეთი არასდროს მინახავს. როგორც გავიგე, გლისჩუკს დაბალი ნიშანი დაუწერა მატჩისის კომისარმა, მაგრამ ტყიბულში მიდის სამსაჯოდ. ვფიქრობ ფედერაციის ახალი შემადგენლობა, ამ ფაქტზე მკაცრად იმსჯელებს, თამაში როცა დამთავრდა კინაღამ ინფარქტი მივიღე“ - აცხადებს „მერცხალის“ პრეზიდენტი, მამუკა გოგუაძე.