ქურდობა, ძარცვა, ყაჩაღობის მცდელობა - ცხემლისხიდის მოსახლეობა გახშირებულ კრიმინალზე საუბრობს

კრიმინალი - 12:14, 21 Nov, 2015

4862

ოზურგეთის მუნიციპალიტეტის ცხემლისხიდის თემის სოფელ უჩხუბში, ბოლო დღეებში თხილის ქურდობის, ძარცვის და ყაჩაღობის მცდელობის რამდენიმე შემთხვევა დაფიქსირდა.
როგორც "ნიუპოსტის" რეგიონალურ კორესპოდენტს უჩხუბში მცხოვრებმა ნაზი ვაშაყმაძემ განუცხადა, დაუდგენელმა პირებმა 130 კილოგრამი თხილი, ღამით მოპარეს:
"პირველ სართულზე მეძინა, თხილი მეორე სართულზე მქონდა, ძალიან ძლიერი წვიმა და ჭექა-ქუხილი იყო, ამიტომ მძარცველების შემოსვლის ხმა არ გამიგია. დილით ვნახე, რომ ბოქლომი გატეხილი იყო, თხილი სულ მთლიანად წაღებული. დავრეკე პოლიციაში, კი დადიან სოფელში მაგრამ არ დამნაშავეებს ვერ მიაგნეს"-აცხადებს დაზარალებული.
თხილის ქურდობის ფაქტზე შს სამინისტრომ სისხლის სამართლის საქმე 177 -ე მუხლით აღძრა.
ვაშაყმაძის მსგავსად, გახშირებულ კრიმინალს აპროტესტებენ, სოფლის სხვა მცხოვრებლებიც.
ადგილობრივების განცხადებით, ვაშაყმაძის ოჯახის გაქურდვიდან ორი დღის შემდეგ, ოთხი შეიარაღებული, ნიღბიანი ბოროტმოქმედი, ამავე სოფლის ერთ ერთ ოჯახში შეიჭრა, თუმცა, მას შემდეგ, რაც, ოჯახის ერთ-ერთი წევრი შეუძლოდ გახდა, "ყაჩაღობა გადაიფიქრეს" და იქაურობაც დატოვეს.
რაც შეეხება დაზარალებულებს ისინი ყაჩაღობის მცდელობის შესახებ კომენტარს არ აკეთებენ.
უჩხობელები გვატყობინებენ, რომ, სოფელში ქურდობა ლამის ყოველდღე ხდება.