რამდენიმე დღის წინ მერაბ ნინიძის ავტობიოგრაფიული წიგნის „მთავარია, მსახიობი არ გამოხვიდე“ პრეზენტაცია გაიმართა. პრეზენტაცის ბოლოს მსახიობმა მსურველებს წიგნზე ავტოგრაფიც დაუტოვა. მსურველთა შორის იყო ბახვა ბრეგვაძეც, რომელმაც საყვარელი მსახიობისგან მართლაც რომ განსხვავებული ავტოგრაფი მიიღო.

„მერაბ ნინიძის წიგნის პრეზენტაციაზე დამპატიჟეს, რომელიც მარიკა ბაკურაძის თანაავტორობით დაიწერა. საღამოს დასასრულს მერაბი წიგნს ხელს რომ აწერდა, მსურველთა შორის მეც ვიყავი. წიგნი გადავაწოდე და იკითხა, ვის სახელზე მოვაწერო ხელიო. ბახვასითქო, რომ ვუთხარი, უცებ შემოტრიალდა ჩემსკენ და ბევრი თბილი სიტყვა და კომპლიმენტი მითხრა. მერე კი წიგნზე მიაწერა: „ბახვა! შე მაგარო, შენი Fan-ი ვარ. სიყვარულით მერაბ ნინიძე.“ მე კიდევ შენი ფანი ვართქო ვეღარ ვუთხარი, მომერიდა გათანაბრება არ გამომსვლოდა მასთან. ამიტომ მხოლოდ ის ვუთხარი, რომ ისეთი რამე დამიწერე სულ ფრენა ფრენით რომ წავიდე სახლშითქო. ჩემი აზრით მერაბ ნინიძე ერთ-ერთი ყველაზე დიდი ქართველი მსახიობია. ძალიან გამიხარდა როცა გავიგე, რომ ის „ჩემი ცოლის დაქალების“ აქტიური მაყურებელია და ძალიან მოსწონს, ეგეც ვიცი. იმედი მაქვს მერაბ ნინიძე რაღაც ეტაპზე ჩვენს სერიალში თავადაც გამოჩნდება“- აღნიშნა ბახვა ბრეგვაძემ „ნიუპოსტთან“ საუბრისას.