იაშვილის სახელობის ბავშვთა კლინიკურ საავადმყოფოში მცდარს უწოდებენ მედიაში გავრცელებულ ინფორმაციას, რომ მშობლებისგან მიტოვებული 2 დღის ბავშვი კლინიკაში იმყოფება და უყურადღებობის გამო მოსახლეობის დახმარებას საჭიროებს.

აღნიშნულთან დაკავშირებით კლინიკის ადმინისტრაცია განცხადებას ავრცელებს:

„განვმარტავთ, რომ ჩვენს კლინიკაში ამ დროისათვის მკურნალობის კურსს არ გადის არცერთი ბავშვი, რომლიც ოფიციალურად მიტოვებულად ითვლება, ასევე არ წევს არცერთი პაციენტი, რომელიც მოსახლეობისგან რაიმე ტიპის მოვლის საგნებს საჭიროებდეს.

გთხოვთ, ნუ გაავრცელებთ გადაუმოწმებელ ინფორმაციას არასრულწლოვან პაციენტებთან დაკავშირებით, ეს არის ძალიან სენსიტიური თემა და ამით პირველ რიგში ზიანი ადგება პაციენტებს და მათ მშობლებს, რომლებიც მ.იაშვილის სახელობის კლინიკაში მკურნალობის პროცესს გადიან.

ნებართვის გარეშე მოპოვებული ფოტო, რომელიც გუშინ სოციალურ ქსელებში და სააგანეტოებში გავრცელდა ეკუთვნის 1 თვის ბავშვს, რომელსაც ურთულესი თანდაყოლილი ნევროლოგიური დიაგნოზი აქვს და მის გადასარჩენად კლინიკა ყველაფერს აკეთებს, მას უკვე ჩაუტარდა მაღალტექნოლოგიური ნეირო-ქირუგიული ოპერაცია და ახლა კლინიკაში მკურნალობის სრულ პროცესს გადის. აღნიშნული პაციენტის ჯანმრთელობის შესახებ ინფორმაციას ბავშვის მშობლების თანხმობის საფუძველზე ვასაჯაროებთ“, - ნათქვამია განცხადებაში.