სტუდენტთა საერთაშორისო დღე

საზოგადოება - 11:57, 17 Nov, 2015

1241

სტუდენტთა საერთაშორისო დღესთან დაკავშირებით აფხაზეთის ავტონომიური რესპუბლიკის უმაღლესი საბჭო ატარებს საზეიმო შეხვედრას, რომელიც გაიმართება 2015 წლის 17 ნოემბერს 19 საათზე „მაგთი-ჯაზ -კლუბში“ (ქ.თბილისი, რუსთაველის გამზირი №22).

ღონისძიებაში მონაწილეობას მიიღებენ აფხაზეთიდან დევნილი წარჩინებული სტუდენტები და ქ.თბილისის წამყვანი უმაღლესი სასწავლებლების რექტორები; მოწვეული არიან საქართველოს მთავრობისა და პარლამენტის ხელმძღვანელები, ცალკეული მინისტრები, ქ.თბილისის მერი და მერიის ხელმძღვანელი პირები; აფხაზეთის ა/რ მთავრობისა და უმაღლესი საბჭოს წევრები; მასმედიის სხვადასხვა საშუალებები.

საგულისხმოა, რომ აფხაზეთის ომს 60-მდე სტუდენტის სიცოცხლე შეეწირა. ეს საღამო, საფრანგეთის ტრაგედიის ფონზე , უპირველესად სწორედ აფხაზეთში სამშობლოს ინტერესების დასაცავად დაღუპული სტუდენტების ხსოვნის პატივისცემას და მათ უკვდავყოფას ეძღვნება.

სტუდენტი-ახალგაზრდობისა და ღონისძიებაზე მოწვეული სტუმრებისათვის მუსიკალური ნომრებით წარდგებიან ქართული თეატრისა და ესტრადის ცნობილი წარმომადგენლები, დაუკრავს ბენდი.

ღონისძიების ორგანიზატორი აფხაზეთის ავტონომიური რესპუბლიკის უმაღლესი საბჭო ავრცელებს მიმართვას:

ღრმად ვართ დარწმუნებული, რომ საქართველოში და მის ფარგლებს გარეთ განათლებას დაწაფებული ჩვენი სტუდენტობა არის სწორედ ის პოტენციური ძალა, რომელიც ფეხს აუწყობს მსოფლიოს თანამედროვე დემოკრატიულ ფასეულობებს, უზრუნველყოფს ჩვენი ქვეყნის ტერიტორიული მთლიანობის აღდგენას, ააღორძინებს ქვეყნის ეკონომიკას, განამტკიცებს მის სუვერენიტეტს და საერთაშორისო ავტორიტეტს.