ძლიერმა ქარმა ოზურგეთის მოსახლეობას პრობლემები შეუქმნა. ამ წუთებში რამდენიმე სოფელს ელექტროენერგია არ მიეწოდება.

როგორც "ნიუპოსტის" რეგიონალური კორესპოდენტი იტყობინება, ძლიერი ქარის შედეგად წაქცეულმა ხეებმა დააზიანა ელექტრო გადამცემი ბოძები. ასევე დაზიანებულია გაზის მილები.

ამ ეტაპზე ქუჩის გაწმენდითი და დაზიანებული სადენების აღდგენითი სამუშაოები მიმდინარეობს აბაშიძის ქუჩაზე, სადაც რამდენიმე მეტრიანი ნაძვის ხის წაქცევამ მთლიანად პარალიზებული გახადა მოძრაობა. ადგილზე 'ენერგო პრო ჯორჯიას" , სამაშველო და დასუფთავების სამსახურის წარმომადგენლები არიან მობილიზებულები.

აღნიშნული ქუჩის მცხოვრებლები "გურიის მოამბესთან" ამბობენ, რომ ნაძვის წაქცევის მიზეზი ინფრასტრუქტურული სამუშაოები გახდა, ამის თაობაზე მოსახლეობამ წერილობით მიმართა ქალაქის დეპუტატსაც, თუმცა ადგილზე არავინ მისულა: "რამდენჯერმე მივმართეთ განცხადებით სხვადასხვა სამსახურებს, მაჟორიტარ დეპუტატსაც, რომ ინფრასტრუქტურული სამუშაოების შედეგად რამდენიმე ნაძვი დაზიანდა, ძირი ფაქტიურად გამოთხრილი ჰქონდა, ვითხოვდით ხეების გადამორვა-გატანას, მაგრამ ყურადღება არავინ მოგვაქცია"-აცხადებენ ადგილობრივები.

ნაძვის წაქცევამ აღნიშნულ ქუჩაზე ერთ ერთი მაცხოვრებლის ღობე და ეზოში მდებარე მაღაზიის ერთი მხარე დააზიანა.

რამდენიმე წუთია შეწყვეტილია საავტომობილო მოძრაობა ოზურგეთი-ბათუმის მიმართულებით.

როგორც "ენერგო პრო ჯორჯიაა" ადგილობრივი სერვისცენტრის ხელმძღვანელი, გია ნაკაიძე გვეუბნება, ქალაქის მოსახლეობას ელექტროენერგიის მიწოდება ერთ საათში აღუდგება, ამ დროისთვის ვერ აკონკრეტებენ, როდის ჩაერთვება შუქი სოფლებს: 'მიმდინარეობს აღდგენითი სამუშაოები და ქალაქს დაახლოებით ერთ საათში აღუდგება ელექტროენერგიის მიწოდება. გამორთულია რამდენიმე სოფელი, სადაც ძლიერი ქარის შედეგად წაქცეულმა ხეებმა ელექტრო გადამცემი ბოძები დააზიანა და ზუსტად ვერ გეტყვით იქ როდის დასრულდება აღდგენითი სამუშაოები. ურეკში, ჯუმათში, მელექედურში, ნასაკირალში, სოფელ ოზურგეთსა და მაკვანეთში აბონენტებს ამ დროისთვის შუქი არ მიეწოდებათ"-გვითხრა ნაკაიძემ.