დე ფაქტო აფხაზეთში ქართველ მასწავლებლებსა და მოსწავლეებს გამოცდების ჩაბარება რუსულად მოუწევთ

საზოგადოება - 15:35, 06 Nov, 2015

1951

ოკუპირებული აფხაზეთის დე ფაქტო განათლების სამინისტროს მიერ მიღებული გადაწყვეტილების შესაბამისად, გალის რაიონის სოფლების ქართულენოვან მასწავლებლებს გამოცდის ჩაბარება რუსულ ენაზე მოუწევთ. შესაბამისი განკარგულება ქართული სკოლის პედაგოგებს გუშინ დაურიგდათ. ახალი კანონის თანახმად, მასწავლებლებს მოეთხოვებათ სოხუმში ტრენინგების გავლა, რუსულ ენაზე გამოცდების ჩაბარება და შესაბამისი სერტიფიკატის აღება. სერთიფიკატის არარსებობის შემთხვევაში, ისინი პედაგოგიური საქმიანობის გაგრძელებას ვეღარ შელებენ.

როგორც "ნიუპოსტს" ადგილობრივებმა აცნობეს, ქართველი მასწავლებლებისთვის შესაბამისი მოთხოვნებით რუსული გამოცდების ჩაბარების აუცილებლობა, ერთგვარი ხრიკია და სკოლებიდან ქართველი მასწავლებლების გაშვებას ისახავს მიზნად. მათი თქმით, ვინაიდან მასწავლებელთა უმრავლესობას ქართული განათლება აქვს მიღებული, არსებობს დიდი ალბათობა, რომ ისინი აფხაზური კანონმდებლობით გათვალისწინებულ გამოცდებს ვერ ჩააბარებენ და მათი ჩანაცვლება აფხაზი და რუსი მასწავლებლებით მოხდება.

პრობლემა ექმნებათ იმ მოსწავლეებსაც, რომლებიც ქართულ ენაზე სწავლობდნენ და შესაბამისად, რუსული გამოცდების ჩაბარება გაუჭირდებათ. დადგენილების მიხედვით, მე9-10 კლასის მოსწავლეებს, დამამთავრებელი კლასის გამოცდების ჩაბარება რუსულ ენაზე მოუწევთ. მშობლების თქმით, ისინი ე.წ. საოკუპაციო ხაზთან ახლოს მდებარე სოფლების ქართულ სკოლებში შვილების გადაყვანასაც ვერ მოახერხებენ, ვინაიდან ქართულ განათლების სისტემასთან აფხაზური ატესტატი და აფხაზური ე.წ. საგანმანათლებლო სისტემა წინააღმდეგობაში მოდის. შესაბამისად, აფხაზური ატესტატის მქონე მოზარდები, ვერც ქართულ უმაღლეს სასწავლებლებში ვერ შეძლებენ სწავლის გაგრძელებას.