პოლიტიკური თოქ-შოუ პოლიტიკოსების გარეშე - მიშველაძე საზოგადოებრივ მაუწყებელზე საზოგადოებრივ-პოლიტიკურ თოქ-შოუს წაიყვანს

საზოგადოება - 14:18, 05 Nov, 2015

3055

პოლიტიკური თოქ-შოუ პოლიტიკოსების გარეშე - ჟურნალისტი ეკა მიშველაძე საზოგადოებრივ მაუწყებელზე რჩება.

როგორც ჟურნალისტმა "ნიუპოსტს" განუცხადა, ის არხზე საზოგადოებრივ-პოლიტიკურ თოქ-შოუს მოამზადებს. გადაცემა ეთერში სავარაუდოდ, 2016 წლის იანვრიდან გავა.

"მონახაზი უკვე მაქვს. გადაცემა უფრო ანალიტიკური იქნება. მის ფორმატზე კი, მიმდინარეობს მსჯელობა საზოგადოებრივი მაუწყებლის ხელმძღვანელობასთან. ტელევიზიის ხელმძღვანელობასთან შეხვედრები გაიმართა, შევხვდი გენერალურ დირექტორს, გიორგი ბარათაშვილს" - განაცხადა ჟურნალისტმა "ნიუპოსტთან".
კითხვაზე მოიწვევს თუ არა ის გადაცემაში მის პოლიტიკოს მეუღლეს, ჟურნალისტმა განაცხადა, რომ პოლიტიკურ თოქ-შოუში პოლიტიკოსები მინიმალისტურად იქნებიან წარმოდგენილნი.
"ჭკვიან ადამიანებს შეუძლიათ გააკეთონ საზოგადოებრივ-პოლიტიკური თოქ-შოუ, პოლიტიკოსების გარეშე"- დასძინა მან.
ეკა მიშველაძეს საზოგადოებრივ მაუწყებელზე თოქ-შოუ "პირველი სტუდია" მიჰყავდა, თუმცა 4 სექტემბრს ჟურნალისტს განუცხადეს, რომ მისი გადაცემა დაიხურა.
მაშინ მიშველაძე მომხდარს პოლიტიკურ ინტერესებს უკავშირებდა. "საზოგადოებრივი მაუწყებელი" კი აცხადებდა რომ გადაცემის დახურვის მიზეზი მიშველაძისა და "თავისუფალი დემოკარტების" ერთ-ერთი ლიდერის, ალექსი პეტრიაშვილის ქორწინება გახდა.
"მაუწყებლის კოდექსის თანახმად, ჟურნალისტმა, რომელიც პოლიტიკური ლიდერის მეუღლეა, უხერხულია, წაიყვანოს პოლიტიკური გადაცემა" - ამბობდა დირექტორის მრჩევლი, ბასა ჯანიკაშვილი.