ვის გადასცა ბუბა კიკაბიძემ ოქროს გასაღები და რამ გააერთიანა ქართველი ვარსკვლავები ერთ ეზოში

კულტურა - 18:14, 03 Nov, 2015

6169

რეჟისორი გიორგი კიკალეიშვილი ახალ ფილმზე - „რობინზონი და 9 პარასკევა,“ ასრულებს მუშაობას, რომელიც ქართულ-აზერბაიჯანული პროექტია. გადაღებები როგორც თბილიში, ასევე ბაქოში მიმდინარეობდა. ფილმის სცენარი ნიკა რამიშვილს ეკუთვნის, ხოლო მუსიკა დათო ევგენიძეს. ფილმში თითქმის ყველა ცნობილი ქართველი მსახიობი და პოპულარული სახე მონაწილეობს. ნანი ბრეგვაძე, კახი კავსაძე, ბუბა კიკაბიძე, რუსუდან ბოლქვაძე, თამარ მაყაშვილი, ნანული სარაჯიშვილი, ზაზა კოლელიშვილი, ვაკაჭი, დათო ხუჯაძე, ქეთა თოფურია, რომა რცხილაძე, ირაკლი ფირცხალავა, მაკა შალიკაშვილი, ნათია წიწილაშვილი, აზერბაიჯანის ყოფილი კულტურის მინისტრი, ამჟამად ელჩი რუსეთში ფოლად ბულბულოღლი. ეს არ არის სრული სია ვისაც ფილმში იხილავთ. როგორც ფილმის პროდიუსერმა ქეთი მიქანაძემ „ნიუპოსტთან“ საუბარში აღნიშნა, „ფილმი ქართულ-აზრებაიჯანულ მეგობრობაზე, მეზობლობაზე და სიყვარულზეა. ფილმის მოქმედება იტალიურ ეზოში იწყება, სადაც დათო ხუჯაძე და რომა რცხილაძე ნარდს თამაშობენ, კახი კავსაძე მენაყინეა, ქეთა ეზოს ფავორიტი და ლამაზმანი გოგონა. რობინზონის როლს პაატა გულიაშვილს ასრულებს, რომელიც ერთის მაგივრად 9 ფემინისტ პარასკევას გადაეყრება. რობინზონი უიღბლო ადამიანია, რომელსაც სიზმარში ბუბა კიკაბიძე ბედნიერების გასაღებს მისცემს.“ როგორ განვითარდება მოვლენები, ამას უკვე ფილმში იხილავთ.