ბანკების მხრიდან მომხმარებლისთვის ინფორმაციის მიწოდება დარღვევებით მიმდინარეობს- სებ-ის კვლევა

ბიზნესი & ეკონომიკა - 14:31, 29 Oct, 2015

2391

ეროვნული ბანკის ვიცე-პრეზიდენტმა ოთარ ნადარაიამ დღეს კომერციული ბანკების წარმომადგენლებთან გამართულ შეხვედრაზე მომხმარებელთა უფლებებთან დაკავშირებით ჩატარებულ კვლევის შესახებ ისაუბრა. კვლევაზე მუშაობა 2015 წელს დაიწყო და მასში რეგიონული მასშტაბით 6 კომერციული ბანკი იყო ჩართული.

სებ-ის ვიცეპრეზიდენტის განცხადებით მიუხედავად იმისა, რომ ბოლო წლებში მომხმარებელთა უფლებების დაცვის თვალსაზრისით, გარკვეული გაუმჯობესებაა, კომერციული ბანკების მხრიდან საბანკო მომსახურების გაწევისას მომხმარებლისთვის აუცილებელი ინფორმაციის მიწოდების წესის მოთხოვნები მნიშვნელოვანი დარღვევებით მიმდინარეობს.

ნადარაიას თქმით, კვლევის შედეგებმა დაადასტურა, რომ ძირითად შემთხვევებში, კომერციული ბანკები მომხმარებლებს ზეპირსიტყვიერად არ აცნობენ ისეთ მნიშვნელოვან ინფორმაციას, როგორიცაა კრედიტის ეფექტური საპროცენტო განაკვეთი, სავალუტო რისკი და ფინანსური ხარჯები. ასევე მომსახურების გაწევის დროს არ ხდება პრეტენზიის დაფიქსირების შეთავაზება ბანკის მხრიდან. გარდა ამისა, ზოგიერთ შემთხვევაში, მომხმარებელს თავის ინიციატივით, პრეტენზიის დაფიქსირების კუთხითაც შეექმნა პრობლემა. ასევე პრობლემები დაფიქსირდა ხელშეკრულების გადაცემასთან დაკავშირებითაც.

"საქართველოს ეროვნული ბანკის "კომერციული ბანკების მიერ საბანკო მომსახურების გაწევისას მომხმარებლისთვის აუცილებელი ინფორმაციის მიწოდების წესის" მოთხოვნებს კვლევის შედეგების მიხედვით, მოცემული ინფორმაციის მიწოდება მომხმარებელთა ურთიერთობისას მნიშვნელოვანი დარღვევებით მიმდინარეობს. ეროვნული ბანკი გააგრძელებს ინტენსიურ დაკვირვებას და კვლევებს, განვიხილავთ ამ პრობლემის მოსაწესრიგებლად მარეგულირებელი ჩარჩოს გამკაცრებას", - განაცხადა ოთარ ნადარაიამ.