შშმ ქალბატონისთვის განახევრებული დახმარების თანხა და სოცაგენტის მუქარა

საზოგადოება - 15:04, 28 Oct, 2015

1985

სოციალურად დაუცველ, მარტოხელა 61 წლის ქალბატონს სოციალური დახმარების პროგრამიდან, ფულადი შემწეობის თანხა გაუნახევრეს.

დოდო ორმოცაძე, ლანჩხუთის ცენტრში ხუთსართულიანი კორპუსის მესამე სართულზე ცხოვრობს. ქალბატონს შეზღუდული შესაძლებლობების გამო, გადაადგილება უჭირს და გარეთ გამოსვლას საერთოდ ვერ ახერხებს.

ამბობს, რომ ერთადერთი შემოსავალი მისთვის პენსიაა, რომელიც საჭირო მედიკამენტების შეძენაში არ ჰყოფნის. სწორედ უსახსრობის გამო მას, არც ბუნებრივი აირი აქვს და ვერც ელექტროღუმელის გამოყენებას ვერ ახერხებს.

- ,,ოთახიდან, ოთახში ორი ჯოხით დავდივარ. წლების წინ ავარიაში მოვხვდი და მას შემდეგ ფეხებში მგრძნობელობა დამეკარგა. ამიტომ დამოუკიდებლად გადაადგილება მიჭირს. ხომ წარმოგიდგენიათ ახლა, რა მდგომარეობაში ვარ. სულ წამლებში ვარ. ამიტომ ეს სოციალური დახმარება ჩემთვის ძალიან მნივნელოვანია. ბუნებრივია, ამას მარტო პენსიით ვერ გავწვდები. გარდა ამისა, სახლში პურის ფულიც ხომ უნდა მქონდეს? გარეთ ვერ გავდივარ, რომ ვინმეს ხმა მივაწვდინო და ვუთხრა. მოვიდა სოციალური აგენტი , არ დაუთვალიერებია არაფერი. ისე შეავსო დეკლარაცია, მომაწერინა ხელი და ამის მერე მომდის სარეტინგო ქულა 64 ათასი. არ ვიცი ვის დავაბრალო. აგენტი თბილისს აბრალებს , თბილისი კიდევ აგენტს. მაცივარი მე არ მაქვს და სარეცხი მანქანა. შმწეობის თანხა რისთვის გამინახევრეს ვიცოდე მაინც“.

ქალბატონი ამბობს, რომ სოციალურ სააგენტოში განუმარტეს, რომ თუკი იჩივლებდა შეიძლებოდა ის 30 ლარიც მოეხსნათ:

..აგენტმა მითხრა, თუ იჩივლებ, შეიძლება ესეც მოგიხსნანო. არვიცი რა გავაკეთო. ისეთ ოჯახებს აქვთ დახმარებები, სამი წევრიდან ორი რომ მუშაობს და თან კიდევ 60-60 ლარს იღებენ".

საუბრის დასასრულს ამბობს, რომ ცხელ ხაზზე დარეკვას აპირებს, კომისიის მხრიდან ხელახალი გადამოწმების მოთხოვნით, თუმცა შიშობს, რომ შესაძლებელია ეს 30 ლარიც ამ ზარს შეეწიროს.

"ახალი რეგულაციის ამოქმედებისა და სარეტინგო ქულის დათვლის შეცვლილი წესების შესაბამისად, ამ ქალბატონს სოციალური დახმარება გაუნახევრდა და არ მგონია რამე შეიცვალოს. თუკი ის ხელახალ გადამოწმებას მოითხოვს, ეს მისი ნებაა" - გვითხრეს ლანჩხუთის სოციალურ სააგენტოში.

თუ რას ითვალისწინებს, სარეიტინგო ქულების დათვლის ახალი წესი, ამ კითხვით გურიის სოციალური მომსახურების სამხარეო ცენტრის ხელმძღვანელს დავუკავშირდით. ვასილ ხომერიკი ამბობს, რომ ოჯახები, რომელთა გადამოწმებაც მოხდა პირველი მაისის შემდეგ, ანუ, ახალი რეგულაციების ამოქმედებიდან, შემწეობის თანხა მათ ეძლევათ მინიჭებული სარეიტინგო ქულების შესაბამისად. ხომერიკის თქმით, დოდო ორმოცაძეს, შემწეობის თანხა 30 ლარამდე იმიტომ შეუმცირდა, რომ მისი სარეიტინგო ქულა აღემატება 57 ათას ქულას. მისივე განმარტებით. თუ ბენეფიციარს მინიჭებული აქვს 10 ათას ერთიდან 30 ათას ერთამდე ქულა, მას ოჯახის თითოეულ წევრზე ენიშნება 60 ლარი, 30 ათას ერთიდან 57 ათას ერთამდე ენიშნებათ 50 ლარი, 57 ათას ერთიდან 60 ათას ერთამდე 40 ლარი და 6-ი ათას ერთიდან 65 ათას ერთამდე 30 ლარი. 100 ათას ერთ ქულამდე კი ყველა ოჯახს 16 წლამდე ბავშვისთვის, თითოეულზე დამატებით დაენიშნება თვეში 10 ლარი-გვითხრა ხომერიკმა.

თეა იოსელიანი - გურია