პირველი ქართველი მსახიობი აზიურ ოსკარზე - რატომ არ ესწრება მიშა გომიაშვილი დაჯილდოვებას

კულტურა - 22:02, 24 Oct, 2015

6782

ქართველი მსახიობი, მიშა გომიაშვილი APSA აზია-წყნარი ოკეანის კინოდაჯილდოვების ნომინანტია. ირანელი რეჟისორის მოჰსენ მაჰმალბაფის ფილმში "პრეზიდენტი" შესრულებული მთავარი როლისთვის, იგი საუკეთესო მამაკაცი მსახიობის ნომინაციაში 4 ნომინანტთან ერთად არის წარდგენილი. APSA აზია-წყნარი ოკეანის კინოდაჯილდოვება 2007 წლიდან ავსტრალიაში, ქალაქ ბრისბანში იმართება და მას აზიურ ოსკარსაც კი უწოდებენ. ფილმები კინოდაჯილდოვებისთვის მსოფლიოს 70 ქვეყნიდან ირჩევა. აღსანიშნავია ისიც რომ აზიის ოსკარის ნომინაციაზე არასდროს ყოფილა წარდგენილი ქართველი მსახიობი. ასე რომ იმედი ვიქონიოთ 26 ნოემბერს მსახიობი მიშა გომიაშვილი ნომინანტებს უკან ჩამოიტოვებს და გამარჯვებულად დასახელდება.

ფილმი „პრეზიდენტი“ საქართველოშია გადაღებული და მასში 50-მდე ქართველი მსახიობი მონაწილეობს. ირანელი რეჟისორის ნამუშევარი უკვე აღიარეს ჩიკაგოს 50-ე საერთაშორისო კინოფესტივალზე, სადაც საუკეთესო ფილმად დასახელდა და მთავარი პრიზის „ოქროს ჰიუგოს“ მფლობელი გახდა. ფილმი პარალელურად გერმანიაშიც არის მიწვეული ფესტივალზე. რაც შეეხება მიშა გომიაშვილს, „ნიუპოსტთან“ საუბრისას აღნიშნა რომ აზიური ოსკარის დაჯილდოვების ცერემონიალს არ დაესწრება.

„ცუდად მაქვს დაცდილი ამ ფესტივალებზე ჩასვლა. სადაც ჩავედი ვერასდროს გავიმარჯვე, ხოლო რომელ ფესტივალზეც არ წავსულვარ ყველაგან პრზი ავიღე. ამიტომ მირჩევნია არც ახლა გავემგზავრო, ინტერნეტით ვუყურო დაჯილდოვების ცერემონიალს და აქედან ვინერვიულო. თან რომ წავდე, ერთ კვირაში ორივე გზაზე 72 საათი უნდა ვიფრინო, რაც ჩემთვის წარმოუდგენელია, არც დრო მაქვს ამდენი და არც ნერვები. ამჟამად რეზო გიგინეიშვილის ახალ ფილმში ვარ დაკავებული, რომლის გადაღებებიც ახლა მიმდინარეობს.“

APSA აზია-წყნარი ოკეანის კინოდაჯილდოვება 26 ნოემბერს გაიმართება. ჩვენ კი ქართველ მსახიობს წარმატებას ვუსურვებთ.