"წითელი ბარათი" ვლადიმერ პაპავას, სტუდენტები რექტორის გადადგომას მოითხოვენ

საზოგადოება - 15:55, 21 Oct, 2015

1898

ხმაურია ამ წუთებში თბილისის სახელმწიფო უნივერსიტეტში. სტუდენტები უნივერსიტეტის რექტორს ვლადიმერ პაპავას უპირისპირდებიან და მის გადადგომას მოითხოვენ.
სტუდენტებმა პაპავას ულტიმატუმი წაუყენეს და დრო 22:00 საათამდე მისცეს. იმ შემთხვევაში თუ თსუ-ს რექტორი დაკავებულ თანამდებობას არ დატოვებს, ახალგაზრდები შიმშილობას დაიწყებენ.
აქციის მონაწილეები ვლადიმერ პაპავას კაბინეტთანაც იმყოფებოდნან. ორგანიზატორებს თან აქვთ მიტანილი წითელი ბარათი იმის ნიშნად, რომ რექტორმა უნდა დატოვოს დაკავებული თანამდებობა. აქციაზე ისმის მოწოდებები : "წადი, წადი!"
როგორც "ნიუპოსტის" კორესპოდენტი ადგილიდან იტყობინება, აქციის მონაწილეთა თქმით, ვლადიმერ პაპავა სახელმწიფო უნივერსიტეტში არსებულ პრობლემებს ვერ აგვარებს.
პრობლემების ჩამონათვალი კი ასე გამოიყურება: ლექტორთა არაკვალიფიციურობა,
უნივერსიტეტში არსებული ბიუროკრატიული მანქანა, ინფრასტრუქტურული და ფინანსური პრობლემები.

"უნივერსიტეტში არის პრობლემები, რომლებიც არ გვარდება. თსუ-ს თვითმმართველობა ვლადიმერ პაპავას ესაუბრა ამ პრობლემებზე, თუმცა მას არაფერზე პასუხი არ ჰქონდა. უნივერისტეტში არსებობს ბიუროკრატიული მანქანა, რათა სტუდენტებმა აქეთ-იქით იარონ პრობლემების გადასაჭრელად და ვერაფერი გაარკვიონ", - განაცხადა თვითმმართველობის პრეზიდენტმა შალვა საბაურმა.

დღესვე ცნობილი გახდა, რომ სტუდენტურმა თვითმმართველობამ სამართლებრივი ბერკეტი გამოიყენა და ფაკულტეტის საბჭოების მუშაობა შეაჩერა.
თვითმართველობის პრეზიდენტის ინფორმაციით, საგამოძიებო უწყებები უნივერსიტეტის საქმიანობის შესწავლას აპირებენ.
სტუდენტის ინფორმაციით, საქმე ეხება სხვადასხვა ტენდერებსა და შესყიდვებს.