რა ელის ,,კატოს“ ცხოვრებას და რა სიახლე ელის ,,ჩემი ცოლის დაქალების“ ახალ სეზონში მაყურებელს

კულტურა - 21:35, 16 Oct, 2015

7627

სერიალი „ჩემი ცოლის დაქალები“ ბევრი სიახლით ხვდება ახალ სეზონს. მათ შორის ერთი მაყურებლისთვის ძალიან კარგი სიახლეა. მათი საყვარელი, ძველი კატო დაბრუნდა. ნინო გაჩეჩილაძე სპეციალურად „ნიუპოსტისთვის“ რადენიმე შეკითხვას პასუხობს. ჩვენ კი წარმატებულ სეზონს ვუსურვებთ მას.

- როგორია ამდენი ხნის შემდეგ კატოს როლზე დაბრუნება?

- სასიამოვნოა რა თქმა უნდა, როცა აღმოაჩენ, რომ თურმე ამდენი მაყურებელი ელოდა ჩემს დაბრუნებას. თუმცა ჩემთვის ეს შემოთავაზება მართლა მოულოდნელი იყო, ცოტა გამიჭირდა გადაწყვეტილების მიღება. ამიტომ აზრი სხვებს ვკითხე და როცა ყველასგან დადებითი პასუხი მივიღე დაბრუნების თაობაზე, მხოლოდ მაშინ დავთანხმდი. სასიხარულოა მონატრებულ კოლეგებთან და სტაფთან შეხვედრა, ჩვენ ოთხი წლის წინ ერთად დავიწყეთ ეს სერიალი და სავარაუდოდ, ერთად დავამთავრებთ.

- სხვა სერიალში არ გამოჩენილხარ ამ დროის განმავლობაში, თუმცა მოთხოვნა იყო. რატომ არ დათანხმდი?

- კი, როგორ არ გამოვჩენილვარ, უბრალოდ ეს პროექტი საქართელოში არ გასულა, ქართულ-აზერბაიჯანული სერიალი იყო, "ალი და თეო", (რეჟისორები ოთარ შამათავა და ლევან კიტია), რომელიც გავიდა აზერბაიჯანულ არხზე, lider tv. სხვა არხებიდანაც იყო შემოთავაზება, მაგრამ იმ წინადადებებს არ დავთანხმდი.

- რას პირდება ამ სეზონზე კატო მაყურებელს?

- ამ სეზონზე კატო მაყურებელს ბევრ სასაცილო და საინტერესო ეპიზოდს პირდება, დაბრუნდება ზუსტად ისეთი პერსონაჟი, როგორიც იყო პირველ სეზონებში: კაპრიზული, ჭირვეული, მაგრამ კეთილი და ინფანტილური..., თუმცა წინასწარ მეც არ ვიცი, რა მოელის მის ოჯახურ ცხოვრებას, როგორ განვითარდება მისი ხაზი, ეს მხოლოდ ქეთი დევდარიანმა იცის, სერიალის სცენარის ავტორმა.

მარიკა ხიდურელი