13 ივნისის სტიქიის შედეგად დაზარალებულ სტუდენტებს სწავლის საფასურს დაუფინანსებენ

საზოგადოება - 14:25, 15 Oct, 2015

1304

13 ივნისის სტიქიის შედეგად დაზარალებულ 30 სტუდენტს ერთი წლის სწავლის საფასური დაუფინანსდებათ.

ამის შესახებ თბილისის მერის მოადგილემ ირაკლი ლექვინაძემ განაცხადა.
მისი თქმით, თანხა მერიის სარეზერვო ფონდიდან გამოიყოფა. როგორც ლექვინაძე განმარტავს, ეს თანხა შეადგენს 71 ათას ლარს და იგი უახლოეს დღეებში სტუდენტებს ჩაერიცხებათ.
ლექვინაძემ აღნიშნული განცხადება საკრებულოში გააკეთა, სადაც დეპუტატებს 13-14 ივნისის სტიქიის შედეგად გაწეული სამუშაოების შესახებ ანგარიში გააცნო.
ლექვინაძის ანგარიშის თანახმად, სტიქიამ 194 ოჯახი დააზარალა, 20 გარდაიცვალა, 2 პირი კი დღემდე დაკარგულად ითვლება, დაზარალდა 800-ზე მეტი ფიზიკური პირი.

ზარალი 100 მილიონ ლარზე მეტს შეადგენს. კერძო კომპანიებისა და მოქალაქეების მიერ შემოწირულობის სახით 22 მილიონ ლარზე მეტი შეგროვდა. ამ თანხიდან 16 მილიონი ლარი დაზარალებულების ერთჯერად დახმარებებს, საცხოვრისით უზრუნველყოფას და სხვა საჭიროებებს მოხმარდა.

ლექვინაძის ცნობით, გარდაცვლილების ოჯახებზე გაიცა 10 ათასი ლარის დახმარება.
ლექვინაძის თქმით, ამჟამად 52 ოჯახს სჭირდება საცხოვრებელი ბინა, მათგან 40-მდე ოჯახთან მიღწეულია შეთანხმება.