ოზურგეთში 83 წლის მოხუცი გაძარცვეს - წაღებულია თხილის მთელი მოსავალი

კრიმინალი - 18:10, 14 Oct, 2015

2498

ორი დღის წინ ოზურგეთის რაიონის სოფელ შრომაში ძარცვის მიზნით 83 წლის მოხუცს თავს დაესხნენ. ღამის საათებში მჟავანაძეების სახლში მისულ მძარცველებს, სახლში მხოლოდ მოხუცი მამაკაცი დახვდათ. თავდამსხმელებმა მას ფიზიკური შეურაცხყოფა მიაყენეს და თხილის მთელი მოსავალი გასტაცეს. მეზობლების თქმით, დაზარალებულმა სანადირო თოფით სცადა სახლში შესული მძარცველების დაშინება, მაგრამ თავდამსხმელებმა თოფი წაართვეს და თავში კონდახი ჩაარტყეს. მათივე ინფორმაციით, დაზარალებულს ტვინის შერყევა აღენიშნება.
შრომის თემში გამგებლის წარმომადგენლის, მაყვალა დარჩიას თქმით, ადგილზე მოსული იყო პოლიცია, კრიმინალური სამსახური და ექსპერტები, ამოღებულია გამოძიებისთვის საჭირო ყველა მასალა.
"მე ეს ამბავი დილით გავიგე, როცა სამსახურში მივედი. ვიცი, რომ ადგილზე მოსული იყო იყო კრიმინალური პოლიცია, გამოძახებული იყო სასწრაფო დახმარების ბრიგადაც. გამოძიებისთვის საინტერესო ყველა მასალა წაღებულია. რამდენადაც მე გავიგე, მძარცველებს მოხუცისთვის თოფი ჩაურტყამთ თავში. ორი დღის წინ მოხდა ეს ამბავი. ამ კაცს შვილი კი ჰყავს, მაგრამ ეტყობა იმ დროს სახლში არ იმყოფებოდა."- განაცხადა მაყვალა დარჩიამ
შსს-ს პრესსამსახურის ცნობით, მომხდარ ფაქტთან დაკავშირებით გამოძიება სისხლის სამართლის კოდექსის 178–ე მუხლის მესამე ნაწილით მიმდინარეობს, რაც ძარცვის მიზნით ბინაში უკანონოდ შეღწევას გულისხმობს.